Венесуэладаги зилзилада АҚШдан депортация қилинганлар жойлаштирилган меҳмонхона қулаб тушди — АBС
Меҳмонхона вайрон бўлиши оқибатида айрим депортация қилинган фуқаролар ҳалок бўлган, бошқалари эса бедарак йўқолган.
Венесуэлада юз берган кучли зилзила оқибатида АҚШдан депортация қилинган венесуэлаликлар вақтинча жойлаштирилган меҳмонхона қулаб тушди. Бу ҳақда АBС Nеws хабар берди.
Маълум қилинишича, 24 июнь куни эрталаб АҚШдан депортация қилинган 146 нафар фуқаро Венесуэлага олиб келинган. Уларнинг 100 нафардан ортиғи Каракасдан 30 километр узоқликдаги Ла Гуаира штатида жойлашган меҳмонхонага жойлаштирилган.
Ўша куннинг кечки қисмида мамлакатда кетма-кет иккита кучли зилзила содир бўлган. АBС телеканалига депортация қилинган фуқароларнинг айрим қариндошлари меҳмонхона қулагани, оқибатда айрим инсонлар ҳалок бўлгани, бошқалари эса бедарак йўқолгани ёки омон қолгани ҳақида маълум қилган.
Эслатиб ўтамиз, 24 июнь куни Венесуэлада 7,2 ва 7,5 магнитудали иккита зилзила қайд этилган. Уларнинг эпицентри Яракуй штати ҳудудида жойлашган.
Сўнгги расмий маълумотларга кўра, табиий офат оқибатида 1 719 киши ҳалок бўлган, 5 034 киши жароҳатланган, касалхоналар ва дала тиббиёт пунктларида рўйхатга олинган жабрланганлар сони эса 22 616 нафарга етган.
