Қашқадарёда 201 кг каннабис, Тошкентда қарийб 2 кг гашиш мусодара қилинди
Ҳар икки ҳолат юзасидан гумонланувчиларга нисбатан жиноят ишлари қўзғатилган. Ҳозирда тергов ҳаракатлари давом этмоқда.
Қашқадарё ва Тошкент вилоятида ўтказилган тезкор тадбирлар давомида 201 килограмм каннабис ва қарийб 2 килограмм гашиш мусодара қилинди. Бу ҳақда ДХХ хабар берди.
Маълум қилинишича, Шаҳрисабз шаҳрида яшовчи 1985 йилда туғилган фуқаро ўз хонадони ҳовлисидаги 5,3 сотих ер майдонида иссиқхона ташкил этиб, сотиш мақсадида 714 туп каннабис ўсимлигини парваришлаётгани аниқланган.
Экспертиза хулосасига кўра, мусодара қилинган каннабиснинг соф оғирлиги 201 килограммни ташкил этган.
Яна бир ҳолатда Тошкент вилоятининг Бекобод шаҳрида яшовчи, 1966 йилда туғилган, муқаддам судланган фуқаро Тошкент шаҳрининг Юнусобод туманида ДХХ ва божхона органлари ходимлари томонидан тўхтатилиб текширилган.
Текширув давомида унинг қўлидаги целлофан пакетдан 1 килограмм 994 грамм гашиш топилиб, ашёвий далил сифатида расмийлаштирилган. Дастлабки маълумотларга кўра, ушбу гиёҳвандлик воситаси қўшни давлатдан контрабанда йўли билан олиб кирилган бўлиб, уни Тошкент шаҳрида сотиш режалаштирилган.
Ҳар икки ҳолат юзасидан гумонланувчиларга нисбатан жиноят ишлари қўзғатилган. Ҳозирда тергов ҳаракатлари давом этмоқда.
