Фарғонада 125 млрд сўмлик сунъий ҚҚС орқали ноқонуний кешбек олиш схемаси аниқланди

Фарғона вилоятида сунъий ҚҚС шакллантириш орқали ноқонуний кешбек олишга қаратилган йирик фирибгарлик схемаси аниқланди. Бу ҳақда вилоят солиқ бошқармаси хабар берди.

 

Маълум қилинишича, яширин иқтисодиётнинг олдини олиш юзасидан олиб борилган тезкор таҳлиллар давомида фуқаро Т.З. раҳбарлигидаги “Э.Ф.Ф.” ва “Ф.Э.О.З.” МЧЖлари томонидан жорий йил май ойида Термиз шаҳрида рўйхатдан ўтган “Т.Б.С.Э.” МЧЖдан жами 1,2 триллион сўмлик ун ва сариёғ маҳсулотлари харид қилингани ҳақида электрон ҳисобварақ-фактуралар расмийлаштирилгани аниқланган.

 

Солиқ органлари корхоналарнинг ҚҚС ҳисоботлари ҳамда уларнинг юридик манзилларидаги омборларни ўрганганда, Фарғонадаги корхоналарга амалда ҳеч қандай маҳсулот етказиб берилмагани, шунингдек, товарлар учун бирор сўм ҳам пул ўтказилмагани маълум бўлган.

 

Дастлабки хулосаларга кўра, Термиздаги корхона Фарғонадаги икки МЧЖ учун 125,4 миллиард сўмлик сунъий ҚҚС шакллантиришга уринган.

 

Тезкор чоралар натижасида “Э.Ф.Ф.” ва “Ф.Э.О.З.” МЧЖларнинг ҚҚС гувоҳномалари вақтинча тўхтатилиб, аниқлаштирилган ҚҚС ҳисоботлари қабул қилинди ҳамда 125,4 миллиард сўмлик сунъий ҚҚС ҳисобдан чиқарилди.

 

Солиқ бошқармаси маълумотига кўра, мазкур схема ижтимоий тармоқлар орқали сохта фискал чекларни сотиш ва улар асосида ноқонуний кешбек олиш имкониятини яратишга қаратилган.

 

Ҳолат юзасидан тўпланган материаллар қонуний чора кўриш учун ҳуқуқни муҳофаза қилувчи органларга тақдим этилган.

 

Солиқ органлари фуқароларни “Солиқ” мобил иловасида фақат ўзлари амалга оширган харидлар ва фойдаланилган хизматлар учун берилган ҳақиқий фискал чекларни рўйхатдан ўтказишга чақирди.

 

Ижтимоий тармоқлар ёки бошқа шахслар орқали тарқатилаётган сохта чекларни рўйхатдан ўтказиш қонунчиликка зид экани ва бунинг учун жавобгарлик белгиланганлиги эслатиб ўтилди.