АҚШ Нигериядан ҳарбийларининг асосий қисмини олиб чиқди

АҚШ жорий йил бошида Нигерияга юборган ҳарбий хизматчиларининг аксариятини мамлакатдан олиб чиқди. Улар ИШИД жангари гуруҳларига қарши курашда Нигерия хавфсизлик кучларини қўллаб-қувватлаш учун сафарбар этилган эди. Бу ҳақда BBC хабар берди.

 

Ўтган йил декабрь ойида АҚШ ва Нигерия ҳарбийлари Чад кўли ҳавзасида қўшма операцияни бошлаган. Операция доирасида Рождество куни жангарилар нишонларига зарбалар берилган, орадан икки ой ўтиб эса қарийб 200 нафар америкалик ҳарбий Нигерияга юборилган.

 

Бир неча ой давом этган операция натижасида “ИШИД” террорчилик гуруҳи етакчиларидан бири Абу-Билол ал-Минукий йўқ қилинган. АҚШнинг Африкадаги Ҳарбий-ҳаво кучлари қўмондони генерал Дагвин Андерсон операция муваффақиятли якунланганини билдириб, Нигериядаги “ИШИД” раҳбариятига жиддий зарба берилганини таъкидлади. Унинг сўзларига кўра, қўшма амалиёт натижасида гуруҳнинг маҳаллий қўмондонлик тизими ва халқаро тармоқ билан алоқалари издан чиқарилган.

 

Нигерия армияси вакили генерал-майор Майкл Оножа эса BBC'га берган изоҳида америкалик ҳарбийларнинг олиб чиқилиши мамлакатнинг терроризмга қарши операцияларига салбий таъсир кўрсатмаслигини айтди. Унинг таъкидлашича, икки давлат ўртасидаги разведка маълумотлари алмашинуви давом этади.

 

Шу билан бирга, АҚШ ва Нигерия олиб борган амалиётларга қарамай, жиҳодчи гуруҳлар, айниқса мамлакатнинг шимоли-шарқий ҳудудларида ҳужумларни давом эттирмоқда.

 

Таҳлилчиларга кўра, “ИШИД” сўнгги йилларда ўз фаолиятини Саҳрои Кабирдан жанубдаги Африка давлатларига йўналтирган. Ҳозирда гуруҳ ҳужумларининг қарийб 90 фоизи ушбу минтақада содир этилмоқда ва унинг Нигериядаги бўлинмаси энг фаол тармоқлардан бири ҳисобланади.

 

Нигерия ҳукумати бир вақтнинг ўзида экстремистик гуруҳлар, қуролли бандитлар ва бошқа жиноий тўдалар таҳдидига қарши кураш олиб бормоқда.