Тошкентда Ҳиндистондан почта орқали юборилган кучли таъсир қилувчи дорилар тўхтатиб қолинди
Жўнатма ичида таркибида жами 1,8 килограмм “Прегабалин” кучли таъсир қилувчи моддаси мавжуд бўлган 6 минг дона капсула борлиги аниқланди.
Тошкентдаги почта бўлимида Ҳиндистондан юборилган жўнатма ичидан 6 минг дона “Прегабалин” капсуласи аниқланди. Бу ҳақда ДХХ хабар берди.
Маълум қилинишича, Тошкент шаҳрининг Юнусобод туманидаги почта бўлимида Тошкент вилоятининг Тошкент туманида яшовчи, 1994 йилда туғилган шахс Ҳиндистондан юборилган почта жўнатмасини қабул қилиб олган вақтида тўхтатилиб, белгиланган тартибда текширилган.
Текширув давомида жўнатма ичида таркибида жами 1,8 килограмм “Прегабалин” кучли таъсир қилувчи моддаси мавжуд бўлган 6 минг дона капсула борлиги аниқланган.
Мазкур ҳолат юзасидан фуқарога нисбатан Жиноят кодексининг 246-моддаси 1-қисми билан жиноят иши қўзғатилган. Ҳозирда тергов ҳаракатлари олиб борилмоқда.
