Афғонистондан дрон ёрдамида наркотик модда олиб ўтишга уриниш тўхтатилди
Тезкор тадбир давомида 2 килограмм 32 грамм опий мусодара қилинди.
Давлат хавфсизлик хизмати маълумотига кўра, ДХХнинг Сурхондарё вилояти бўйича бошқармаси, Чегара қўшинлари ҳамда Ички ишлар органлари ходимлари ҳамкорлигида ўтказилган тезкор тадбир давомида наркотик моддалар контрабандасига чек қўйилди.
Аниқланишича, Афғонистон ҳудудидаги номаълум шахслар Амударё орқали гиёҳвандлик воситаларини дрон ёрдамида Ўзбекистон ҳудудига олиб ўтишга уринган.
Тезкор чоралар натижасида ноқонуний уриниш ўз вақтида бартараф этилиб, учувчисиз учиш аппаратига маҳкамланган 2 килограмм 32 грамм опий ашёвий далил сифатида мусодара қилинди.
Мазкур ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.
