Қамчибек Ташиев ҳукмдан бир кун ўтмай футбол учрашувида кўриниш берди
Ташиев ҳокимиятни куч билан эгаллашга уринишда айбдор деб топилганди.
Қирғизистон Миллий хавфсизлик давлат қўмитасининг собиқ раиси Қамчибек Ташиев 3 июль куни Манас шаҳридаги “Курманбек” стадионида бўлиб ўтган Қирғизистон Премер-лигаси учрашувини томоша қилди. Бу ҳақда 24.kg хабар берди.
Маълум қилинишича, тарқалган кадрларда Ташиевнинг VIP трибунага кириб бораётгани акс этган. Мазкур учрашувда “Мурас Юнайтед” ва “Азиягол” жамоалари ўзаро баҳслашиб, ўйин 1:1 ҳисобидаги дуранг билан якунланган.
Эслатиб ўтамиз, 2 июль куни Бишкекнинг Биринчи май туман суди “75 лар хати” деб номланган жиноят иши бўйича ҳукм чиқарган эди. Суд Ташиевни ҳокимиятни куч билан эгаллашга уриниш айби билан тўрт йил муддатга озодликдан маҳрум қилиш ва мол-мулкини мусодара этишга ҳукм қилди.
Шу билан бирга, суд унга уч йил муддатга пробация назоратини қўллагани сабабли у озодликдан маҳрум этиш жазосини амалда ўтамайди.
Лавозим ваколатини суиистеъмол қилиш айблови бўйича эса Ташиев оқланди. Унинг адвокати ҳукм устидан апелляция шикояти берилишини маълум қилган.
