Жиззахда 100 минг сўм пора олган ППХ инспекторига 20,6 млн сўм жарима тайинланди
У икки йил муддатга ИИОда мансабдорлик ва моддий жавобгарлик билан боғлиқ лавозимларда ишлаш ҳуқуқидан маҳрум қилинди.
Жиззах вилоятининг Фориш туманида ҳайдовчидан 100 минг сўм пора олган патруль-пост хизмати инспектори суд ҳукми билан жаримага тортилди. Бу ҳақда “Дарё” хабар берди.
Маълум бўлишича, Б.Х. Жиззах вилояти ИИБ Жамоат тартибини сақлаш бошқармаси патруль-пост хизмати баталёнида инспектор лавозимида ишлаган. У Жиззах шаҳридаги "Эски шаҳар буюм бозори" ҳудуди олдида хизмат олиб бораётган вақтда тақиқланган жойда тўхтаган Чанган русумли микроавтобусни тўхтатиб, ҳайдовчига маъмурий баённома расмийлаштирилиши, автомобиль жарима майдончасига олиб кетилиши ва бунинг оқибатида 1 миллион сўмдан ортиқ жарима ҳамда бошқа харажатлар юзага келишини билдирган.
Ҳайдовчи оилавий шароитини важ қилиб, уни огоҳлантириш билан қўйиб юборишни сўраган. Шундан сўнг инспектор аввал 1 миллион сўм, кейин эса 100 минг сўм эвазига масалани ҳал қилишни таклиф қилган. Ҳайдовчи сўралган маблағни инспектор кўрсатган банк картасига ўтказиб берган.
Ҳайдовчи шу куннинг ўзида ички ишлар органларига мурожаат қилган. Хизмат текшируви якунига кўра, инспектор эгаллаб турган лавозимидан бўшатилган.
Жиноят ишлари бўйича Фориш тумани суди Б.Х.ни Жиноят кодексининг 210-моддаси 1-қисми (пора олиш) билан айбдор деб топди. Унга базавий ҳисоблаш миқдорининг 50 баравари — 20,6 миллион сўм миқдорида жарима жазоси тайинланди.
Шунингдек, суд ҳукми билан Б.Х. икки йил муддатга ички ишлар органларида мансабдорлик ва моддий жавобгарлик билан боғлиқ лавозимларда ишлаш ҳуқуқидан маҳрум қилинди.
