Ҳайдовчилар ЙПХ ходимларига тегишли ҳужжатларининг асл нусхасини тақдим этиши шартми?
“Узкомназорат” ЙПХ ходимларига ҳужжатларни электрон шаклда кўрсатиш мумкинлиги ҳақида видео эълон қилди. ЙҲХХ эса бу маълумотни эски таҳрир асосида рад этди.
Ижтимоий тармоқларда “Узкомназорат” матбуот хизмати томонидан ЙПХ ходими транспорт воситасини тўхтатганида ҳайдовчи ҳужжатларини электрон шаклда тақдим этиши мумкинлиги ҳақида видео эълон қилинди. Шундан сўнг Йўл ҳаракати хавфсизлиги хизмати (ЙҲХХ) ушбу маълумотни ҳақиқатга тўғри келмаслигини билдириб, уни рад этди.
Бироқ, ЙҲХХ “фейк” деб баҳолаган хабарга раддияни эски таҳрир асосида тайёрлагани маълум бўлгани ҳақида хабар тарқалди. Қайд этилишича, хизмат ўз изоҳида Вазирлар Маҳкамасининг 2024 йил 27 декабрдаги 897-сон қарорининг аввалги таҳририга таянган.
Ҳолбуки, мазкур қарорга 2026 йил 21 майдаги 271-сон қарор билан ўзгартириш киритилган. Янгиланган таҳрирда “ички ишлар органлари ходимлари томонидан” деган қўшимча киритилган бўлиб, у рақамли сервислар орқали шакллантирилган ҳужжатларни ички ишлар органлари ходимларига электрон кўринишда тақдим этиш имкониятини ҳам назарда тутади.
Шу боис, ЙҲХХ раддиясида амалдаги эмас, балки олдинги таҳрирдаги ҳуқуқий норма асос қилиб олингани ҳақида саволлар пайдо бўлмоқда.
