“Ҳудудий электр тармоқлари” Андижон филиалининг 12 нафар ходимига нисбатан жиноят иши очилди
Филиалда электр ҳисоблагичлари билан боғлиқ қонунбузарликлар аниқланиб, ходимларга қамоққа олиш эҳтиёт чораси қўлланилди.
“Ҳудудий электр тармоқлари” АЖ Андижон ва Самарқанд филиалларида электр энергияси ҳисоблагичларини истеъмолчиларга ўрнатиш жараёнлари юзасидан хизмат текширувлари ўтказилаётганини маълум қилди.
Хабарга кўра, Ички аудит хизмати ҳамда Комплаенс назорати хизмати томонидан олиб борилган ўрганишлар давомида Андижон ҳудудий филиалида электр ҳисоблагичларини ўрнатиш жараёнида қонунчилик талабларининг бузилгани ва ҳисоблагичлар камомади аниқланган.
Мазкур ҳолатлар юзасидан ҳуқуқни муҳофаза қилувчи органларга хабар берилган. Натижада қонунбузарлик содир этганликда гумон қилинаётган филиалнинг 12 нафар ходимига нисбатан жиноят иши қўзғатилиб, қамоққа олиш эҳтиёт чораси қўлланилган. Ҳозирда жамиятга етказилган зарарни ундириш бўйича чоралар кўрилмоқда.
Шунингдек, текширувлар давомида Самарқанд шаҳрида электр ҳисоблагичлари жамият маблағлари ҳисобидан истеъмолчиларга ноқонуний равишда ўрнатилгани ҳам аниқланган. Ушбу ҳолат юзасидан ҳам ҳуқуқни муҳофаза қилувчи органларга мурожаат қилинган.
“Ҳудудий электр тармоқлари” АЖ маълум қилишича, Самарқанд вилоятининг бошқа шаҳар ва туманларида ҳам электр ҳисоблагичларини ўрнатиш жараёнлари юзасидан ўрганишлар давом эттирилмоқда.
