АҚШ Эронга қарши янги санкциялар жорий қилди
Янги санкциялар Эроннинг молиявий тармоқлари ва Али Ансорий бошқарувидаги активлар тизимини ўз ичига олади.
АҚШ Молия вазирлиги Эроннинг молиявий тармоқлари ҳамда айрим жисмоний ва юридик шахсларига нисбатан қўшимча санкциялар жорий этилганини маълум қилди.
Вазирлик ҳузуридаги Хорижий активларни назорат қилиш бошқармаси (ОFАС) томонидан эълон қилинган янги санкциялар рўйхатига 14 нафар жисмоний ва юридик шахс, жумладан, 8 нафар шахс ва 6 та компания киритилди.
Санкциялар, хусусан, эронлик молиячи Али Ансорийга нисбатан қўлланилган. АҚШ Молия вазирлиги маълумотига кўра, у Эроннинг олий раҳбари Можтаба Хоманаий ҳамда мамлакат сиёсий элитасининг манфаатлари йўлида фаолият юритувчи халқаро активлар тармоғини бошқарган. Шунингдек, Ансорий давлат маблағларини ўзлаштириш ва уларни Эрон ташқарисида ноқонуний мақсадларда ишлатишда айбланмоқда.
Бундан ташқари, Эрон, Гонконг, Бирлашган Араб Амирликлари ҳамда Цент-Китс ва Невисда рўйхатдан ўтган бир қатор компаниялар ҳам санкциялар рўйхатига киритилган.
АҚШ Молия вазирлиги баёнотига кўра, ушбу компаниялар санкция остидаги Эрон банклари номидан ҳар йили миллиардлаб доллар миқдоридаги маблағларни айлантириш, шунингдек, ноқонуний молиявий операцияларни яшириш мақсадида қобиқ компаниялар тармоғидан фойдаланган.
Янги чекловлар Ҳормуз бўғози атрофидаги вазият кескинлашган бир пайтда жорий этилган. Аввалроқ АҚШ Эроннинг Ҳормуз бўғозидаги ҳаракатларига жавобан мамлакат ҳудудига ҳаво зарбалари берганини билдирган эди. Шундан сўнг Теҳрон Қувайт, Баҳрайн ва Иорданиядаги АҚШ ҳарбий объектларига зарбалар йўллаган.
