АҚШ Ҳормуз бўғози масаласида Эронга янги талаблар қўйди
Вашингтон Теҳрондан Ҳормуз орқали ўтувчи кемаларга ҳужум қилинмаслигини эълон қилишни сўради.
АҚШ маъмурияти Эрондан Ҳормуз бўғозида халқаро кемалар ҳаракати хавфсизлигини таъминлаш бўйича расмий баёнот беришни талаб қилмоқда. Бу ҳақда Reuters агентлиги АҚШ расмийларига таяниб хабар берди.
Агентлик маълумотларига кўра, Вашингтон Теҳрондан Ҳормуз бўғозидаги барча сув йўллари халқаро кемалар учун очиқ эканини расман эълон қилишни ҳамда бўғоз орқали ҳаракатланаётган кемаларга ҳужум қилинмаслигини очиқ баён этишни сўрамоқда.
АҚШ расмийларидан бирининг таъкидлашича, Вашингтон, шунингдек, Эроннинг Ҳормуз бўғози орқали ўтувчи кемалардан ҳеч қандай тўлов ундирмаслигини ҳам расман маълум қилишини кутмоқда.
“Биз эронликлардан Ҳормуз бўғозидаги барча сув йўллари очиқ эканини ва энди кемаларга ўқ узилмаслигини оммавий равишда эълон қилишларини талаб қиламиз”, — деган АҚШ расмийси.
Ахiоs хабарига кўра, АҚШ ушбу баёнот 11 июль куни эълон қилинишига умид қилмоқда.
Reuters қайд этишича, АҚШ расмийлари сўнгги кунларда Вашингтон ва Теҳрон ўртасида ўтказилган музокараларни самарали деб баҳоламоқда. Шу билан бирга, томонлар ўртасидаги музокаралар давом этмоқда.
