АҚШ Эронга яна зарба берди, Ҳормуз бўғози ёпилди
АҚШ бир ҳафта ичида учинчи бор Эрон ҳудудига зарба берди. Бунга Ҳормуз бўғозидаги фуқаролик кемасига уюштирилган ҳужум сабаб қилиб кўрсатилди.
АҚШ Қуролли кучлари Марказий қўмондонлиги (CЕNТCОМ) 12 июлга ўтар кечаси Эрон ҳудудига навбатдаги зарбалар сериясини бошлаганини маълум қилди, дея хабар бермоқда Point.md.
CENTCOM баёнотига кўра, ҳужумлар Кипр байроғи остида Ҳормуз бўғози орқали ҳаракатланган GFS Galaxy контейнер кемасига Эрон Ислом инқилоби қўриқчилари корпуси томонидан уюштирилган ҳужумга жавобан амалга оширилган. АҚШ ҳарбийлари маълумотига кўра, кема экипажининг бир аъзоси бедарак йўқолган, бортдаги ёнғин ва машина бўлимига етган жиддий зарар сабаб кема сафарини давом эттира олмаяпти.
Эроннинг Press TV телеканали эса Теҳронда ҳаво ҳужумидан мудофаа тизимлари ишга тушгани, шунингдек, Сирик, Конарак, Чобаҳор, Жаск ва Бандар-Аббос шаҳарларида портлашлар овози эшитилгани ҳақида хабар берди.
АҚШ мудофаа вазири Пит Ҳегсет Эрон "нотўғри танлов қилгани" ва бунинг оқибатлари учун жавоб бераётганини таъкидлади.
Шу билан бирга, Ислом инқилоби қўриқчилари корпуси Ҳормуз бўғозида ҳаракатланган кемага огоҳлантирувчи ўқ узилганини, бунга кема Эрон белгилаган йўналиш бўйлаб ҳаракатланмагани сабаб бўлганини билдирди. Эрон томони Ҳормуз бўғози АҚШнинг минтақадаги ҳарбий ҳаракатлари тўхтатилмагунча ёпиқ қолишини маълум қилди ҳамда зарбалар давом этса, Яқин Шарқдаги АҚШ ҳарбий базаларига янги ҳужумлар уюштирилиши мумкинлиги ҳақида огоҳлантирди.
Маълумот учун, 17 июнь куни АҚШ ва Эрон ҳарбий ҳаракатларни тўхтатиш ҳамда Ҳормуз бўғозини қайта очишни назарда тутувчи доиравий келишувни имзолаганди. Бироқ 25 июнь куни бўғоздаги фуқаролик танкерига уюштирилган ҳужумдан сўнг томонлар ўртасидаги кескинлик яна кучайди. 8 июль куни АҚШ президенти Доналд Трамп Эрон билан тузилган меморандум энди амал қилмаслигини маълум қилган эди.
