“Англияга қарши баҳс футболдан каттароқ”: Аргентина вице-президенти инглизларни “қароқчилар” деб атади
Виктория Вилярруэл Жаҳон чемпионати ярим финалида Англияга қарши баҳс олдидан кескин баёнот билан чиқди. Скалоне учрашувга сиёсий тус бермасликка чақирди.
Аргентина вице-президенти Виктория Вилярруэл Жаҳон чемпионати ярим финали олдидан Англияга қарши бўладиган учрашув юзасидан Х ижтимоий тармоғида баёнот берди. Бу ҳақда Al Jazeera хабар берди.
“Биз босқинчи,қароқчиларга қарши ўйнаймиз. Бу шунчаки навбатдаги ўйин эмас”, — деб ёзди у.
Вилярруэлнинг таъкидлашича, Англияга қарши баҳс Аргентина учун нафақат спорт, балки тарихий ва сиёсий рамзий аҳамиятга ҳам эга.
“Бу Малвин ороллари, бу Диэго, бу Леонинг сўнгги мундиали ва босқинчиларни тўхтатиш масаласидир”, — деди витсе-президент марҳум футбол афсонаси Диэго Марадона ҳамда терма жамоа сардори Лионел Мессини назарда тутиб.
Мазкур баёнот Жанубий Атлантикадаги Фолкленд (Аргентинада Малвин деб аталади) ороллари устидан давом этаётган ҳудудий низолар фонида янгради. Вилярруэлнинг отаси 1982 йилда Аргентина ва Буюк Британия ўртасида Фолкленд ороллари учун бўлиб ўтган урушда қатнашган.
Шу билан бирга, Аргентина терма жамоаси бош мураббийи Лионел Скалоне учрашувга сиёсий тус бермасликка чақирди.
“Бу оддий футбол ўйини, холос. Футболни сиёсат билан аралаштириш телбалик бўларди”, — деди у.
Шунингдек, Аргентина хавфсизлик вазирлиги ярим финал бўлиб ўтадиган АҚШнинг Атланта шаҳридаги стадионда Фолкленд (Малвин) оролларига оид байроқлар ва бошқа рамзий буюмларни олиб кириш тақиқланишини маълум қилди.
