Тошкент–Нурафшон йўлининг бир қисми 21 июлгача ёпилади

Тошкент ва Нурафшон шаҳарларини боғловчи D-002 автомобиль йўлининг бир қисмида транспорт воситалари ҳаракати вақтинча тўхтатилади.

 

Маълум қилинишича, Тошкент вилояти ҳокимининг тегишли фармойишига асосан йўл инфратузилмасини қуриш ишларини якунлаш, ҳаракат хавфсизлигини таъминлаш ва тирбандликларнинг олдини олиш мақсадида 21 июлгача D-002 автомобиль йўлининг 4-километридан 9-километригача бўлган қисмида барча транспорт воситалари ҳаракати тўлиқ чекланади.

 

Чеклов янги қурилаётган кўприкдан бошланиб, Ўрта Чирчиқ туманидаги Авангард аҳоли яшаш ҳудудигача бўлган масофани қамраб олади.

 

Шу муносабат билан Бекобод шаҳри ва тумани ҳамда Бўка туманидан Тошкент томон ҳаракатланаётган ҳайдовчиларга D-020 Қорасув–Бўка–Бекобод автомобиль йўли орқали Бўка кўпригидан ўнгга бурилиб, А-373 Тошкент–Ўш автомобиль йўлидан фойдаланиш тавсия этилди.

 

Пискент, Ўрта Чирчиқ туманлари ва Нурафшон шаҳридан Тошкентга йўл олувчилар эса D-002 автомобиль йўлининг 26-километридаги “Текстиль” чорраҳаси ёки 23-километрдаги Гуландон савдо мажмуаси олдидан ўнгга бурилиб, D-014 Ғазалкент–Ўрта Сарой–Нурафшон автомобиль йўли орқали ҳаракатланиши мумкин.

 

Бундан ташқари, ҳайдовчилар D-002 автомобиль йўлининг 9-километридаги Авангард аҳоли яшаш ҳудудидан маҳаллий аҳамиятга эга 10В-111Б йўли орқали Ўрта Сарой қишлоғидан А-373 Тошкент–Ўш автомобиль йўлига чиқиб, Тошкент томон ҳаракатланишлари мумкин.

 

Масъуллар ҳайдовчилардан вақтинчалик чекловни инобатга олиб, қатновларини олдиндан режалаштириш ҳамда тавсия этилган айланма йўллардан фойдаланишни сўради.

 

Эслатиб ўтамиз, Тошкент ва Нурафшон ўртасида BRT (Бus Rapid Transit) тизимини жорий этиш режалаштирилган. Лойиҳа амалга оширилгач, икки шаҳар ўртасидаги қатнов вақти қарийб икки баравар қисқариб, 30 дақиқани ташкил этиши, 150 мингдан ортиқ аҳолининг ҳаракатланиши эса янада хавфсиз ва қулай бўлиши кутилмоқда.