Теlegram'да наркошоп очган собиқ футболчи ушланди
У аввал ҳам шу турдаги жиноят учун судланган бўлишига қарамай, ноқонуний фаолиятини қайта йўлга қўйган.
Ички ишлар вазирлиги Тезкор қидирув департаменти ҳамда унинг ҳудудий бўлинмалари томонидан Telegram мессенжерида турли номлар остида фаолият юритган ботлар орқали гиёҳвандлик воситалари ва психотроп моддалар савдоси билан шуғулланган шахснинг ноқонуний фаолиятига чек қўйилди.
Маълум қилинишича, ботлар фаолиятини бошқарган шахс икки ой аввал Жиноят кодексининг 278-8-моддаси учинчи қисми "а" банди билан судланган бўлишига қарамай, жиноий фаолиятини яна давом эттирган.
Тергов маълумотларига кўра, 1999 йилда туғилган ушбу фуқаро илгари профессионал футбол клубида тўп сурган, ҳозирда эса болалар оромгоҳида жисмоний тарбия машғулотларини олиб борган. У бир нечта "наркошоп" фаолиятини қайта йўлга қўйгани аниқланган.
Суриштирув давомида унга тегишли Тelegram-ботлар орқали гиёҳвандлик воситалари ва психотроп моддалар савдосидан олинган маблағлар криптоактивларга айлантирилиб, шахсий криптобиржа аккаунти орқали турли молиявий операциялар амалга оширилгани аниқланган.
Дастлабки ҳисоб-китобларга кўра, ноқонуний фаолият давомида 550 миллион сўмдан ортиқ маблағ турли криптоҳамён манзилларига ўтказилган.
Мазкур ҳолат юзасидан ушбу шахсга нисбатан Жиноят кодексининг 278-8-моддаси иккинчи қисми "а" банди билан жиноят иши қўзғатилди. Ҳозирда тергов ҳаракатлари давом этмоқда.
