Зангиотада “заправка” портлади: уч киши жароҳатланди
Ҳозирда ҳодисанинг келиб чиқиш сабаблари ўрганилмоқда.
Тошкент вилоятининг Зангиота туманида жойлашган автомобилларга пропан газ тўлдириш шохобчасида портлаш содир бўлди. Ҳодиса оқибатида уч нафар фуқаро тан жароҳати олди. Бу ҳақда Фавқулодда вазиятлар вазирлиги маълум қилди.
Қайд этилишича, 16 июль куни соат 22:46 да Тошкент вилояти Фавқулодда вазиятлар бошқармасига Зангиота тумани ҳудудидан ўтувчи М-39 автомобиль йўли бўйида жойлашган автомобилларга пропан газ тўлдириш шохобчасида фавқулодда ҳолат юз бергани ҳақида хабар келиб тушган.
Дастлабки маълумотларга кўра, шохобча ҳудудидаги пропан газ сақлаш сиғими ҳамда пропан ташишга мўлжалланган махсус автомобилда чақнаш содир бўлган.
Воқеа жойига зудлик билан етиб борган қутқарувчилар ёнғинни 17 июль куни соат 00:04 да тўлиқ бартараф этган.
Ҳодиса оқибатида тан жароҳати олган уч нафар фуқаро шошилинч тиббий ёрдам бригадалари томонидан шифохонага олиб борилган. Уларнинг саломатлиги юзасидан қўшимча маълумот берилмаган.
Ҳозирда ҳодисанинг келиб чиқиш сабаблари бўйича тегишли тартибда суриштирув ишлари олиб борилмоқда.
Эслатиб ўтамиз, аввалроқ Қарши шаҳридаги автомобилларга газ тўлдириш шохобчасида юз берган портлаш оқибатида 6 киши ҳалок бўлганди.
