Эрон олий раҳбари уруш тугамагунча омма олдида кўриниш бермайди — ТАСС
Қарор хавфсизлик билан боғлиқ бўлиб, мамлакатдаги вазият барқарорлашгач Мужтабо Хоманаийнинг жамоатчилик олдида чиқиш қилиши кутилмоқда.
Эроннинг олий раҳбари Мужтабо Хоманаий АҚШ ва Исроил билан уруш якунланиб, мамлакатдаги хавфсизлик вазияти барқарорлашмагунча омма олдида чиқиш қилмайди. Бу ҳақда ТАСС агентлиги эронлик манбага таяниб хабар берди.
Нашр манбасининг айтишича, бундай қарор хавфсизлик нуқтаи назаридан қабул қилинган.
"Ҳукумат вазият барқарорлашишини кутмоқда. Шундан кейин олий раҳбар жамоатчилик олдида чиқиш қилади", — дея маълум қилган манба.
Қайд этилишича, Хоманаийнинг хорижий давлат раҳбари билан илк алоқаси Россия президенти Владимир Путин билан телефон орқали мулоқот ёки шахсий учрашув шаклида бўлиши мумкин.
АҚШ ва Исроил 28 февраль куни Эронга қарши ҳарбий амалиёт бошлаган. Ҳаво ҳужумлари оқибатида Эроннинг аввалги олий раҳбари Оятуллоҳ Али Хоманаий ҳамда мамлакатнинг яна бир қатор юқори мартабали раҳбарлари ҳалок бўлган.
Июнь ойида Вашингтон ва Теҳрон барча фронтларда, жумладан Ливанда ҳам ўт очишни тўхтатишни назарда тутувчи англашув меморандумини имзолаган. Шундан сўнг томонлар Швейсариянинг Бюргеншток ҳудудида Қатар ва Покистон воситачилигида музокаралар ўтказган.
Бироқ 8 июль куни АҚШ Теҳронни аввалги келишувларни, хусусан, Ҳормуз бўғози бўйича мажбуриятларни бузганликда айблаб, Эронга нисбатан кенг кўламли ҳаво ҳужумларини қайта бошлаган.
13 июль куни Эрон Ташқи ишлар вазирлиги матбуот котиби Исмоил Бағоий Теҳрон меморандум шартларини бузмаганини, унинг бажарилмай қолиши учун масъулият АҚШ зиммасида эканини маълум қилган.
