Тошкент ва унинг атрофидаги иссиқхоналар учун ер ҳамда мол-мулк солиғи 10 баравар оширилиши мумкин
Иситиш қозонхоналари демонтаж қилинган ёки электр энергияси билан иситиладиган иссиқхоналарга оширилган мол-мулк ва ер солиғи татбиқ этилмайди
Тошкент шаҳри ва Тошкент вилоятининг айрим туманларида жойлашган иссиқхоналарга нисбатан ер ва мол-мулк солиғининг оширилган ставкаларини жорий этиш таклиф қилинмоқда. Тегишли қонун лойиҳаси 31 июлга қадар жамоатчилик муҳокамасига қўйилди.
Лойиҳага кўра, Тошкент шаҳри ҳамда Тошкент вилоятининг Юқори Чирчиқ, Қибрай, Янгийўл, Зангиота ва Тошкент туманларидаги иссиқхоналар эгаллаган қишлоқ хўжалиги ерларига ер солиғи амалдаги ставканинг 10 баравари миқдорида белгиланади. Шунингдек, бундай иссиқхоналарга нисбатан амалдаги солиқ имтиёзлари қўлланилмайди.
Бунда иситиш қозонхоналари демонтаж қилинган ёки электр энергияси билан иситиладиган иссиқхоналарга оширилган мол-мулк ва ер солиғи татбиқ этилмайди. Бу ҳақдаги маълумотларни экология ва атроф-муҳитни муҳофаза қилиш соҳасидаги ваколатли орган тақдим этади.
Қонун лойиҳасига кўра, мазкур ўзгартиришлардан мақсад Тошкент шаҳри ва вилоятидаги экологик вазиятга иссиқхона хўжаликларининг салбий таъсирини камайтириш ҳамда иссиқхоналарда экологик хавфсиз ва энергия тежамкор иситиш технологияларидан фойдаланишни рағбатлантиришдан иборат.
Вазирлар Маҳкамасининг 2026 йил 9 апрелдаги қарорига мувофиқ, Тошкент шаҳри ҳамда Тошкент вилоятининг Юқори Чирчиқ, Қибрай, Янгийўл, Зангиота ва Тошкент туманларида кўмир, мазут ва атмосферага зарарли бошқа ёқилғилардан фойдаланадиган янги иссиқхона хўжаликларини ташкил этиш ҳамда уларни давлат рўйхатидан ўтказиш 2026-йил 1 июндан тақиқланган.
Шунингдек, атроф-муҳит ва аҳоли саломатлигига салбий таъсир кўрсатаётган Тошкент шаҳри ва вилоятидаги иссиқхона хўжаликларини Сурхондарё вилоятидаги “Сурхон-Агро” эркин иқтисодий зонасига босқичма-босқич кўчириш режалаштирилган.
