Аргентинанинг ЖЧ-2026 финалидаги мағлубиятдан сўнг Буэнос-Айресда тартибсизликлар юз берди
Тартибсизликлар оқибатида камида 15 киши қўлга олинди.
2026 йилги ФИФА Жаҳон чемпионати финалида Аргентина терма жамоасининг Испанияга мағлуб бўлганидан сўнг Буэнос-Айрес марказида мухлислар ва полиция ўртасида тўқнашувлар юз берди.
Воқеа Аргентина пойтахтидаги футбол байрамлари анъанавий тарзда нишонланадиган Обелиск ёдгорлиги атрофида содир бўлган. Финал учрашувини томоша қилиш учун минглаб мухлислар ушбу ҳудудга тўпланган. Вазият ярим тунгача тинч кечган, бироқ бир гуруҳ мухлис ҳимоя тўсиқларини бузиб ўтишга уринганидан кейин тартибсизликлар бошланган.
Шундан сўнг айрим мухлислар полиция ходимларига шиша идишлар ва бошқа буюмларни улоқтирган. Ҳуқуқ-тартибот идоралари оломонни тарқатиш учун кўздан ёш оқизувчи газ ҳамда сув пуркагич машиналардан фойдаланган.
Маҳаллий ОАВ тарқатган суратларда кўчаларга турли буюмлар сочилиб кетгани, шунингдек, ерда ётган мухлисни тепган полициячи акс этгани айтилмоқда.
Расмий маълумотларга кўра, тартибсизликлар ортидан камида 15 киши қўлга олинган. Яна бир неча киши жароҳатланган, бироқ уларнинг аҳволи ҳақида батафсил маълумот берилмаган.
Финал учрашувида Испания қўшимча бўлимларда Ферран Торрес урган гол эвазига 1:0 ҳисобида ғалаба қозониб, ўз тарихидаги иккинчи жаҳон чемпионлиги унвонини қўлга киритди.
Учрашув интизомий можаролар билан ҳам йодда қолди. Аргентина ярим ҳимоячиси Энсо Фернандес ўйин давомида қизил карточка олди. Леандро Паредес эса финал ҳуштагидан сўнг Испания ҳимоячиси Эрик Гарсияга нисбатан тажовузкор ҳаракат қилгани учун майдондан четлатилди.
Шу билан бирга, Аргентина президенти Хавер Милей терма жамоани қўллаб-қувватлаш мақсадида мамлакатда умумхалқ дам олиш куни эълон қилинишини маълум қилди. Байрам санаси футболчилар ва мураббийлар штаби билан келишилган ҳолда белгиланади.
