АҚШнинг Эрон билан уруш харажатлари 37,5 миллиард долларга етди

 
АҚШ Мудофаа вазири Пит Ҳегсетнинг маълум қилишича, Эрон билан давом этаётган уруш мамлакатга ҳозиргача 37,5 миллиард долларга тушган. Бу Пентагон эълон қилган аввалги ҳисоб-китобдан қарийб 8 миллиард долларга кўпдир. Бу ҳақда Reuters хабар берди.

 
Ҳегсет бу рақамни Сенатнинг маблағ ажратиш қўмитасидаги эшитувда эълон қилган. Унинг айтишича, ҳисоб-китобга уруш бошланганидан буён қилинган харажатлар ҳамда 30-центабргача режалаштирилган ҳарбий харажатлар киритилган.

 
Шу билан бирга, Трамп маъмурияти Конгрессдан Эрон билан боғлиқ ҳарбий амалиётларни давом эттириш учун қўшимча 90 миллиард доллар атрофида маблағ ажратишни сўраган. Пентагон раҳбарияти бу маблағ ҳарбий тайёргарликни сақлаш, қурол-яроғ захираларини тўлдириш ва амалиётларни давом эттириш учун зарурлигини билдирган.

 
Сенатдаги эшитув давомида айрим қонунчилар уруш харажатлари ва ҳарбий стратегия юзасидан маъмуриятни танқид қилган. Улар можаро қанча давом этиши ва қўшимча маблағлар қандай сарфланиши ҳақида батафсил маълумот талаб қилган.

 
АҚШ ва Эрон ўртасидаги сулҳ шу ой бошида бузилганидан бери томонлар ҳар куни ўзаро зарбалар алмашмоқда. Пентагон маълумотига кўра, можаро давомида АҚШнинг 18 нафар ҳарбий хизматчиси ҳалок бўлган, 430 нафарга яқини яраланган.