Ҳиндистондаги туннель қулаши оқибатида 20 киши ҳалок бўлди
Туннелнинг қулашига метан газининг портлаши сабаб бўлган бўлиши мумкинлиги тахмин қилинмоқда.
Ҳиндистоннинг Сикким штатида қурилаётган гидроэлектр станцияси туннелида юз берган фожиа оқибатида ҳалок бўлганлар сони 20 нафарга етди.
The Times of India нашри хабарига кўра, қутқарувчилар туннель остидан 20 нафар ишчининг жасадини олиб чиққан. Улардан 13 нафарининг шахси аниқланган.
Дастлабки маълумотларга кўра, туннель ичида 27 киши бўлган. Улардан 2 нафари омон чиқишга муваффақ бўлган, яна 5 нафар бедарак йўқолган ишчини қидириш ишлари давом этмоқда.
Қутқарув операцияси туннель ичида газ тўпланиб қолгани сабаб мураккаблашмоқда. Мутахассислар ҳодисага метан газининг сизиб чиқиши ва портлаши сабаб бўлган бўлиши мумкинлигини тахмин қилмоқда.
Воқеа Ҳиндистон Миллий гидроэлектр компанияси (NHPC) томонидан барпо этилаётган 7 километрлик туннелда содир бўлган. Қурбонлар орасида компаниянинг юқори лавозимли ходимларидан бири ҳам бор.
Маҳаллий ҳокимият ҳодиса юзасидан махсус экспертлар гуруҳи томонидан кенг қамровли тергов ўтказилишини маълум қилди.
