Келишув бўлмаса, йўқотишлар янада кучаяди — Рубио
АҚШ Давлат котибининг айтишича, Теҳрон АҚШ билан келишувга эришмагунча иқтисодий ва ҳарбий йўқотишлари ортишда давом этади.
АҚШ Давлат котиби Марко Рубио Эрон АҚШ билан келишувга эришмагунча мамлакат кўраётган зарар кун сайин ортиб боришини маълум қилди.
Рубио бу ҳақда ASEAN саммити доирасида ўтказилган матбуот анжуманида сўзга чиқиб, Эрон битимларни имзолагач уларни бузиши ёки шартларни ўзгартиришга уринаётганини таъкидлади.
"Битимлар шундай ишламайди. Энди улар бунинг нархини тўламоқда. Агар яқин кунларда ҳам фикрларини ўзгартирмаса, улкан зарар кўришда давом этади", — деди АҚШ Давлат котиби.
Унинг сўзларига кўра, Теҳрон ташқи томондан қатъиятли кўринишга уринаётган бўлсада, амалда аллақачон жиддий йўқотишларга дуч келган ва бунинг учун катта нарх тўламоқда.
Эслатиб ўтамиз, 8 июль куни АҚШ ва Эрон ўртасида ҳарбий кескинлик яна кучайди. Вашингтон Теҳронни Ҳормуз бўғозида танкерларни ўққа тутганликда айблаб, сулҳни бекор қилганини эълон қилган. Шундан сўнг АҚШ Эрон ҳудудига зарбалар беришни давом эттирган бўлса, Эрон ҳам бунга жавобан минтақадаги АҚШ ҳарбий базаларига ҳужумлар уюштирмоқда.
