Андижонда 11 ёшли ўғлига автомобиль бошқартирган ота жазоланди
ЙПХ томонидан тўхтатилган Спарк автомобили рулида 11 ёшли бола, олд ўриндиқда унинг укаси, орқа ўриндиқда эса отаси ўтиргани аниқланди.
Андижон вилоятининг Асака туманида вилоят Йўл-патруль хизмати ходимлари томонидан ўтказилган рейд давомида Spark русумли автомобиль тўхтатилган. Текширув чоғида транспорт воситасини 4-синф ўқувчиси бўлган 11 ёшли бола бошқараётгани аниқланган. Автомобилнинг олд йўловчи ўриндиғида унинг укаси, орқа ўриндиғида эса отаси бўлган.
Ҳолат юзасидан транспорт воситасини бошқариш ҳуқуқига эга бўлмаган шахсга автомобилни бошқаришга берганлиги учун ҳайдовчига нисбатан белгиланган тартибда маъмурий баённома расмийлаштирилган.
Шунингдек, Андижон вилоятида ўтказилаётган рейдлар давомида ҳайдовчилик гувоҳномасисиз автомобиль бошқариш, маст ҳолда рулга ўтириш ва бошқа қоидабузарликлар ҳам аниқланмоқда.
Масъуллар қайд этишича, рейдлар бошланганидан буён 4 мингдан ортиқ транспорт воситаси жарима майдонига жойлаштирилган. Улар орасида 150 дан ортиқ ҳайдовчилик ҳуқуқидан маҳрум этилган шахснинг рулга ўтиргани, 400 дан ортиқ ҳайдовчилик гувоҳномасисиз автомобиль бошқаргани, 100 га яқин рухсатсиз ойна қорайтириш ҳамда 80 га яқин маст ҳолда транспорт воситасини бошқариш ҳолати қайд этилган.
