Жанубий Кореяга ишга юборишдаги 90 млн долларлик иш бўйича суд бошланади
Жиноят иши доирасида тўрт нафар шахсга нисбатан бир қатор оғир моддалар билан айблов эълон қилинган.
Жанубий Кореяга ишга юбориш билан боғлиқ, қарийб 90 миллион АҚШ доллари зарар етказилгани айтилаётган жиноят иши бўйича суд жараёни 29 июль куни Жиноят ишлари бўйича Бектемир туман судида бошланади.
“Эзгулик” инсон ҳуқуқлари жамияти раиси Абдураҳмон Ташановнинг маълум қилишича, иш Жиноят ишлари бўйича Бектемир туман судида судья Дадахонова раислигида кўриб чиқилади. Мазкур жиноят иши юзасидан дастлабки тергов Бош прокуратура томонидан олиб борилган.
Судланувчилар сифатида Ғанчар Уммат ўғли Узоқов, Тимур Бадриддинович Шариксиев, Алижон Ғаниевич Ашуров ҳамда Сухроб Санжарович Сайфутдинов иштирок этмоқда.
Уларга нисбатан Жиноят кодексининг 210-моддаси 3-қисми “а” ва “б” бандлари (пора олиш), 243-моддаси (жиноий фаолиятдан олинган даромадларни легаллаштириш) ҳамда 301-моддаси 1-қисми (ҳокимиятни суиистеъмол қилиш, ҳокимият ваколатидан четга чиқиш ёки ҳокимият ҳаракатсизлиги) бўйича айблов эълон қилинган.
Айни пайтда судланувчиларнинг айби суд томонидан исботланмаган. Ўзбекистон қонунчилигига кўра, шахс суднинг қонуний кучга кирган ҳукми билан айбдор деб топилмагунча айбсиз ҳисобланади.
Эслатиб ўтамиз, 2026 йил май ойида Бош прокуратура ҳузуридаги департамент Жанубий Кореяга ишга юбориш билан боғлиқ йирик коррупсион схема фош этилганини маълум қилганди. Тергов маълумотларига кўра, Ташқи меҳнат миграцияси агентлиги ҳамда айрим хусусий бандлик агентликларининг собиқ мансабдорлари иштирокидаги жиноий гуруҳ фуқаролардан расмий тўловлардан ташқари 7–12 минг АҚШ долларидан ноқонуний маблағ йиққан.
Тергов давомида ушбу схема орқали қарийб 90 миллион доллар, шунингдек, алоҳида эпизодлар бўйича яна 45 миллион доллар ноқонуний олингани аниқлангани билдирилган.
