FIFA собиқ Президенти Жаҳон чемпионатига инвестор жалб этиш режасини танқид қилди
У мундиал тижорат активи эмас, балки жаҳон футболининг маданий мероси эканини таъкидлади.
FIFA'нинг собиқ президенти Зепп Блаттер Жаҳон чемпионатини бошқариш учун алоҳида компания ташкил этиш ва унинг 20 фоиз улушини ташқи инвесторларга таклиф қилиш режасини кескин танқид қилди. Унинг фикрича, мундиал тижорат активи эмас, балки бутун футбол жамоатчилигига тегишли маданий мерос ҳисобланади.
FIFA'нинг 1998–2015 йилларда президенти бўлган Зепп Блаттер Жаҳон чемпионатини бошқариш тизимига хусусий инвесторларни жалб этиш ташаббусига қарши чиқди. У Reuters агентлигига берган интервьюсида футболни тижорат манфаатларига бўйсундириш спортнинг асосий қадриятларига путур етказишини таъкидлади.
Блаттернинг сўзларига кўра, футбол ҳеч бир шахс ёки ташкилотнинг мулки эмас.
“Футбол ҳеч кимга тегишли эмас. У халққа тегишли”, — деди FIFA собиқ раҳбари.
Унинг фикрича, FIFA фойда олишга йўналтирилган корпоратив тузилмага айланса, ташкилот ўзининг асл моҳиятини йўқотади.
Аввалроқ FIFA Жаҳон чемпионати ва бошқа йирик мусобақаларни бошқариш учун алоҳида шўба компания тузишни режалаштираётгани ҳамда ундаги улушнинг 20 фоизигача бўлган қисмини ташқи инвесторларга таклиф этиши мумкинлигини маълум қилганди.
Мазкур ташаббус Европа футбол доираларида, хусусан, UEFA томонидан танқид қилинди. Ташкилот бу қарор Жаҳон чемпионатини тижорат активига айлантириш хавфини туғдиришини билдирган.
Блаттер эса мундиал хусусий инвестиция фондлари учун даромад манбаига айлантирилмаслиги кераклигини таъкидлади.
“FIFA Жаҳон чемпионати бир гуруҳ раҳбарларга тегишли бўлган тижорат активи эмас. У жаҳон футболининг маданий меросининг ажралмас қисмидир. FIFA эса унинг эгаси эмас, балки ҳимоячисидир”, — деди у.
Собиқ президентнинг айтишича, FIFA'ни бошқарган даврида у бундай ташаббусни ҳеч қачон кўриб чиқмаган бўларди. Унинг фикрича, фойда ва таъсир ортидан қувувчи инвесторларнинг спорт бошқарувига кириб келиши аъзолар манфаатларини ҳимоя қилиш тамойилига зид.
Блаттер замонавий футболнинг юз йилдан ортиқ вақт давомида оммалашиб келаётганига сабаб айнан унинг жамоатчилик манфаатларига хизмат қилаётганида эканини қайд этиб, бу тамойил ўзгармаслиги лозимлигини таъкидлади.
