Хитой Эронга ҳаво ҳужумидан мудофаа тизимини етказиб бериши мумкин
Эрон уруш давомида заифлашган ҳаво мудофаасини тиклаш мақсадида Хитойдан юзлаб кўчма зенит-ракета мажмуаларини қабул қилиш арафасида.
Эрон яқин ҳафталарда Хитойда ишлаб чиқарилган 400 тагача кўчма ҳаво ҳужумидан мудофаа ракета тизимларининг илк партиясини қабул қилиши кутилмоқда. Етказиб берилиши режалаштирилаётган тизимлар орасида QW-12 ва FN-16 русумлари борлиги айтилмоқда. Битим қиймати 60–70 миллион доллар атрофида баҳоланмоқда.
Ушбу қуроллар Эроннинг қисқа масофали ҳаво мудофааси имкониятларини тиклашга хизмат қилади. АҚШ ва Исроил билан юз берган сўнгги ҳарбий тўқнашувлар давомида Эроннинг бир қатор ҳаво мудофаа объектлари зарба остида қолган эди. Етказиб бериладиган ушбу ракета мажмуалари паст баландликда учувчи самолёт, вертолёт ва дронларга қарши самарали восита ҳисобланади.
Қурол-яроғни етказиб бериш бўйича келишув Гонконгда рўйхатдан ўтган Zhongqing Baoshang International Investment компанияси орқали амалга оширилмоқда. Шу билан бирга, юкни Эронга қайси йўналиш орқали етказиш масаласи ҳамон муҳокама қилинаётгани, ҳаво ва қуруқлик йўллари кўриб чиқилаётгани айтилмоқда. Хитой расмийлари бу борадаги маълумотларни рад этган, Покистон эса юк транзитига алоқадорлиги ҳақидаги тахминларни инкор қилган.
Ҳарбий таҳлилчиларнинг фикрича, кўчма зенит-ракета мажмуалари Эроннинг стратегик ҳаво мудофаа тизимлари ўрнини боса олмайди, бироқ ҳарбий базалар, муҳим инфратузилма объектлари ва қўшинларни паст баландликдан амалга ошириладиган ҳужумлардан ҳимоя қилиш имкониятини сезиларли даражада оширади. Бундай тизимларнинг мобил характерга эгалиги уларни аниқлаш ва йўқ қилишни ҳам мураккаблаштиради.
