Жиззах ва Паркентда минг тоннадан ортиқ асфальт талон-торож қилинди
Текширувларда жами 1 174 тонна асфальт ва 672,7 млн сўм бюджет маблағлари билан боғлиқ қонунбузарликлар фош этилган.
Жиззах вилоятининг Шароф Рашидов тумани ҳамда Тошкент вилоятининг Паркент туманида ободонлаштириш бошқармалари мансабдор шахслари иштирокида минг тоннадан ортиқ асфальтни талон-торож қилиш ҳолатлари фош этилди.
Бош прокуратура ҳузуридаги Департаментнинг Шароф Рашидов тумани бўлими томонидан ўтказилган терговга қадар текширувда туман Ободонлаштириш бошқармаси масъул шахслари 6 та ички йўлда асфалтлаш ишларини амалда бажармаган ҳолда, харид қилинган қиймати 348,7 млн сўмлик 634 тонна асфальтни нақд пулга сотиб юборгани ва маблағларни ўз эҳтиёжлари учун ишлатгани аниқланган.
Шунингдек, Департаментнинг Паркент тумани бўлими ўтказган текширувда туман Ободонлаштириш бошқармаси масъул шахслари ўзаро тил бириктириб, “G.W.” МЧЖ томонидан 540 тонна асфальт етказиб берилмаган бўлса-да, маҳсулот қабул қилингани ҳақида сохта ҳисоб-фактуралар расмийлаштиргани маълум бўлган. Натижада 324 млн сўм миқдоридаги бюджет маблағлари ўзлаштирилгани аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилди. Ҳозирда тергов ҳаракатлари давом эттирилмоқда.
