Фарғонада маст ҳайдовчи уриб кетган ЙПХ ходими вафот этди
“Spark” бошқарган ҳайдовчи ЙПХ ходимининг тўхташ ҳақидаги қонуний талабига бўйсунмай, уни уриб юборган.
Фарғона вилоятининг Ўзбекистон туманида хизмат вазифасини бажараётган ЙПХ ходими маст ҳайдовчи бошқарувидаги автомобиль уриб кетиши оқибатида ҳалок бўлди.
Вилоят Йўл ҳаракати хавфсизлиги бошқармаси маълумотига кўра, йўл-транспорт ҳодисаси 31 июль куни соат тахминан 23:30 да Ўзбекистон тумани «Ўқчи» МФЙ ҳудудидан ўтувчи 40В064 автомобиль йўлининг 20-километрида содир бўлган.
Дастлабки маълумотларга кўра, 1996 йилда туғилган А. Э. маст ҳолда “Spark” русумли автомобилни бошқариб кетаётиб, тунги хизматни олиб бораётган Фарғона вилояти ИИБ Жамоат хавфсизлиги хизмати Йўл ҳаракати хавфсизлиги бошқармаси 2-минтақавий ҳудуд ЙПХ отряди 3-сафарбар гуруҳи катта инспектори, сержант Хайитбек Каримжоновнинг тўхташ ҳақидаги қонуний талабига бўйсунмаган ва уни уриб юборган.
Оқибатда сержант Хайитбек Каримжонов оғир тан жароҳатлари билан шифохонага олиб борилган. Шифокорлар томонидан кўрсатилган барча тиббий муолажаларга қарамай, у жонлантириш бўлимида вафот этган.
Маълум қилинишича, Хайитбек Каримжонов 2022 йилдан буён ички ишлар органларида хизмат қилган. Унинг ортидан онаси, турмуш ўртоғи ҳамда икки нафар фарзанди қолди.
Ҳолат юзасидан тегишли тартибда тергов ҳаракатлари олиб борилмоқда.
