Сирдарёда собиқ мураббийи шилқимлик қилган қизга тайинланган жарима бекор қилинди
Мураббий 5 суткага қамалди. Қиз хиёбонда бақир-чақир қилгани учун жаримага тортилган эди.
Сирдарё вилояти Сайхунобод туманида собиқ мураббийи томонидан жинсий шилқимликка учраган 18 ёшли қизга майда безорилик учун тайинланган маъмурий жарима апелляция инстанцияси томонидан бекор қилинди. Бу ҳақда Сирдарё вилояти судлари хабар бeрди.
Суд ҳужжатларига кўра, воқеа 2026 йил 17 июль куни Сайхунобод туманидаги "Шодлик" маҳалласида жойлашган хиёбонда содир бўлган. Спорт мактабида мураббий бўлиб ишловчи С.Х. аввал ўзига шогирд бўлган қизни учратиб, унга жинсий алоқа таклиф қилган ва шаҳвоний шилқимлик қилган. Қизнинг бундан жаҳли чиққан, С.Х билан жанжаллашиб, бақир-чақир қилган.
Сайхунобод туман суди С.Х.ни Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик) билан айбдор деб топиб, унга нисбатан 5 сутка маъмурий қамоқ жазоси тайинлаган.
Шу билан бирга, қиз хиёбонда бақир-чақир қилгани учун Маъмурий жавобгарлик тўғрисидаги кодекснинг 183-моддаси (майда безорилик) билан айбдор деб топилиб, унга базавий ҳисоблаш миқдорининг уч баравари — 1 млн 236 минг сўм миқдорида жарима белгиланган эди.
Кейинчалик мазкур қарор устидан берилган шикоят Сирдарё вилоят судининг апелляция инстанциясида кўриб чиқилди. Суд биринчи инстанция қарорини қизга нисбатан бекор қилди.
Апелляция инстанцияси қарорида қайд этилишича, қизнинг ҳаракатларида маъмурий ҳуқуқбузарлик ҳодисаси мавжуд эмас. Шу сабабли унга оид маъмурий иш Маъмурий жавобгарлик тўғрисидаги кодекснинг 271-моддаси 1-қисми асосида тугатилди.
Шунингдек, вилоят суди маъмурий иш бўйича суриштирув ҳаракатларини олиб борган ички ишлар органи профилактика инспектори ҳамда ишни кўрган Сайхунобод туман судининг тергов судьясига нисбатан тегишли тақдимномалар киритди.
