Қатар АҚШ ва Эрон ўртасидаги музокараларда силжиш борлигини билдирди

Қатар АҚШ ва Эрон ўртасидаги урушни тўхтатишга қаратилган дипломатик саъй-ҳаракатларда муайян силжиш кузатилаётганини маълум қилди. Бироқ Теҳрон АҚШ президенти Доналд Трампнинг томонлар ўртасида музокаралар бошланганига оид баёнотини рад этди, дея хабар берди Reuters.

 

Қатар Ташқи ишлар вазирлиги матбуот котиби Мажид ал-Ансорийнинг айтишича, воситачилар иштирокидаги мулоқотлар муҳим босқичга кирган. Қатар, Покистон ва Уммон АҚШ ҳамда Эрон ўртасида таклифлар алмашинуви ва музокараларни йўлга қўйиш устида ишламоқда.

 

Шунга қарамай, Эрон АҚШ билан тўғридан-тўғри музокаралар олиб борилаётганини инкор этди. Теҳрон фақат Уммон билан Ҳормуз бўғози масаласида мулоқот қилаётганини, яқин кунларда АҚШ билан учрашувлар режалаштирилмаганини билдирди.

 

АҚШ президенти Доналд Трамп аввалроқ Эрон билан музокаралар бошланганини ва Теҳрон келишувга эришиш учун "сўнгги имконият"га эга эканини айтганди. Бироқ АҚШ Давлат котиби Марко Рубио ҳамда Молия вазири Скотт Бессент музокаралар ҳали якунланмаганини, аммо Ҳормуз бўғози орқали кемалар қатновини тиклаш бўйича ижобий силжиш кузатилаётганини маълум қилди.

 

Рубионинг сўзларига кўра, томонлар якуний келишувга ҳали эришмаган, бироқ бунга яқинлашмоқда. Бессент эса бўғозни қайта очиш бўйича келишув сешанба ёки чоршанба куни имзоланиши мумкинлигини айтди.

 

Мазкур баёнотлар фонида жаҳон бозорида нефть нархи пасайди. Brent маркали нефть нархи 4 фоиздан ортиқ арзонлади. Инвесторлар Ҳормуз бўғози орқали юк ташиш тез орада тикланишига умид қилмоқда. Аммо бўғозда хавфсизлик билан боғлиқ муаммолар сақланиб қолмоқда.

 

Буюк Британиянинг Денгиз савдоси операциялари маркази (УКМТО) маълумотига кўра, Уммон соҳиллари яқинида Ҳормуз бўғози ҳудудида ҳаракатланган қуруқ юк кемаси номаълум снаряд зарбасига учраган. Reuters манбалари экипаж кемани тарк этганини, денгизчилардан бири бедарак йўқолганини хабар қилди.

 

Таҳлилчиларга кўра, Эрон Ҳормуз бўғози ва минтақадаги денгиз йўлларидан босим воситаси сифатида фойдаланишда давом этмоқда. Шу билан бирга, Reuters манбалари АҚШ уруш давомида юқори аниқликдаги узоқ масофали ракеталар захирасининг сезиларли қисмини сарфлаб бўлгани ҳақида хабар берди. Бу эса Вашингтоннинг узоқ муддатли ҳарбий салоҳияти борасида саволларни кучайтирмоқда.

 

Воситачилар музокараларда ижобий силжиш кузатилаётганини билдираётган бўлса-да, АҚШ ва Эрон расмийлари томонлар ўртасидаги мулоқот масаласида ҳануз бир-бирига зид баёнотлар бермоқда.