Эрон Ҳормуз бўғозини очиш учун АҚШдан компенсация талаб қилмоқда
Теҳрон ва Оман бўғоз орқали вақтинчалик кемалар қатновини йўлга қўйиш масаласини муҳокама қилмоқда.
Эрон Ҳормуз бўғози орқали денгиз қатновини қайта йўлга қўйиш учун АҚШдан компенсация талаб қилмоқда. Бу ҳақда Point.md хабар берди.
Эрон ташқи ишлар вазири Аббос Ароқчининг сўзларига кўра, Эрон Оман билан Ҳормуз бўғози орқали кемалар қатновига оид келишув тузишга яқин. Бироқ бу келишув сув йўлининг тўлиқ очилишини англатмайди. Ароқчи Эрон АҚШдан тинчлик келишувини бузганлик учун компенсация кутаётганини билдирди.
Айни пайтда Эрон ва Оман Ҳормуз бўғози орқали кемалар ҳаракати учун вақтинчалик йўналиш тафсилотларини муҳокама қилмоқда. Таклиф этилаётган тартибга кўра, тижорий кемалар бўғозга Эрон ҳудудий сувлари орқали кириб, Оман ҳудудий сувлари орқали чиқади.
Эрон Ташқи ишлар вазирлиги маълумотига кўра, ушбу вақтинчалик йўналиш икки ойдан тўрт ойгача амал қилиши мумкин. Зарурат туғилса, унинг амал қилиш муддати узайтирилади.
Ислом инқилоби қўриқчилари корпуси вакили Ҳусайн Моҳебби эса Ҳормуз бўғози нафақат иқтисодий ва денгиз йўли, балки мамлакатнинг геосиёсий устунлиги рамзи эканини таъкидлади.
