Россияда теракт режалаштирган ва Сурияга кетмоқчи бўлган сурхондарёлик 4 йигит қамалди

Сариосиё туманида террористик ташкилотлар ғояларини тарғиб қилган, яширин гуруҳ тузиб, қўпорувчилик ва бошқа жиноий ҳаракатларни режалаштирган шахслар судланди. Бу ҳақда ДХХ хабар берди.

 

Маълум қилинишича, 2003 йилда туғилган Сариосиё тумани фуқароси 2023 йилда ишлаш мақсадида Россиянинг Маҳачқалъа шаҳрига борган. У ерда “Муҳаммад” лақабли маҳалладоши билан ижтимоий тармоқлар орқали ақидапарастлик ғояларини тарғиб қилувчи видеоларни кўриб, яширин гуруҳ тузган.

 

Кейинчалик улар гуруҳ сафига 2005 йилда туғилган яна бир йигитни жалб қилган. Гуруҳ аъзолари Сурияга боришни режалаштирган. Бунинг учун улардан бири оила аъзоларининг пул маблағларини рухсатсиз олиб чиққан.

 

Улар Москва—Истанбул йўналиши орқали Туркияга, ундан кейин Сурияга ўтишни мўлжаллаган. Бироқ Москва шаҳрига етиб боргач, гуруҳ аъзолари ўртасида келишмовчилик юзага келган ва икки нафари Ўзбекистонга қайтган.

 

“Муҳаммад” эса Қозон шаҳрида қотиллик содир этгани учун Россия қонунчилигига асосан жавобгарликка тортилган.

 

Гуруҳнинг 2005 йилда туғилган аъзоси Ўзбекистонга депортация қилинган. У суд ҳукми билан 7 йилга озодликдан маҳрум этилган. Шунга қарамай, гуруҳнинг қолган аъзолари фаолиятини давом эттирган. 1999 ва 2001 йилларда туғилган яна икки нафар Сариосиё тумани фуқароси гуруҳга қўшилган.

 

Улар террористик ташкилотлар ғояларини тарғиб қилган ҳамда Россиянинг Маҳачқалъа шаҳрида ҳуқуқ-тартибот ходимларига қарши жиноий ҳаракатларни амалга оширишни режалаштирган.

 

Бундан ташқари, гуруҳ аъзолари Сариосиё туманида яшовчи 2004 йилда туғилган яна бир фуқарони ўз сафига жалб қилган. Тергов жараёнида гуруҳ аъзоларининг жиноятлари далиллар билан ўз тасдиғини топган.

 

Жиноят ишлари бўйича Сариосиё туман суди ҳукмига кўра, тўрт нафар шахс Жиноят кодексининг тегишли моддаларида назарда тутилган жиноятларни содир этганликда айбли деб топилган.

 

Суд ҳукми билан уларнинг ҳар бирига 8 йил 6 ой муддатга озодликдан маҳрум қилиш жазоси тайинланган.