Фарғонада “Мансур Казанский” лақабли шахс товламачиликда гумонланиб ушланди

Фарғона вилоятида “Мансур Казанский” лақаби билан танилган, уюшган жиноятчиликка алоқадор шахс товламачиликда гумонланиб ушланди. Бу ҳақда Фарғона вилояти ИИБ ахборот хизмати маълум қилди.

 

Маълум қилинишича, Арипов Мансур Фозилович Тошкент шаҳрида яшовчи фуқарога тегишли нотурар жойни 1,2 млн долларга сотиб олишга келишган. Ҳисоб-китобни объектни гаровга қўйиш орқали банк кредити ҳисобидан амалга ошириш режалаштирилган.

 

Объект нотариал тартибда Арипов номига расмийлаштирилганидан сўнг, у кредитнинг ойлик тўловлари ва фоизлари билан танишиб, қарз олишдан бош тортган. Шундан кейин эса нотурар жойни асл эгасига қайтариш ўрнига, уни жабрланувчи номига қайта расмийлаштириб бериш эвазига 200 минг доллар талаб қилгани айтилмоқда.

 

Бундан ташқари, Арипов 1968 йилда туғилган шериги билан бирга жабрланувчининг тадбиркор ҳамкорига босим ўтказиб, уни қораловчи материаллар тўплангани ва жиноий жавобгарликка тортилиши билан қўрқитган ҳамда ундан пул талаб қилган.

 

Фарғона вилояти ИИБ ва ДХХ ходимлари ҳамкорлигида ўтказилган тезкор тадбир давомида гумонланувчи Фарғона шаҳридаги Бурҳониддин Марғиноний кўчасида жойлашган нотариал идорада нотурар бинони жабрланувчига қайта расмийлаштириб бериш эвазига 100 минг доллар олаётган вақтида ашёвий далиллар билан ушланди.

 

Ҳолат юзасидан Жиноят кодексининг 165-моддаси (товламачилик) билан жиноят иши қўзғатилган. Жиноятга алоқадор шахслар процессуал тартибда ушланган.

 

Ҳуқуқ-тартибот органлари мазкур шахсларнинг ноқонуний хатти-ҳаракатларидан жабр кўрган фуқаролар бўлса, 102 рақамига қўнғироқ қилиб хабар беришларини сўраган.