Татаристон президенти Ўзбекистон ва Тожикистон президентларига ҳамдардлик билдирди
Нижнекамскдаги дрон ҳужуми оқибатида Ўзбекистон ва Тожикистон фуқаролари ҳам ҳалок бўлган эди.
Татаристон раҳбари Рустам Минниханов Нижнекамск шаҳрига уюштирилган дрон ҳужуми оқибатида Ўзбекистон ва Тожикистон фуқаролари ҳалок бўлгани муносабати билан Ўзбекистон Президенти Шавкат Мирзиёев ҳамда Тожикистон Президенти Имомали Раҳмонга ҳамдардлик телеграммаларини йўллади. Бу ҳақда Татаристон раҳбари матбуот хизмати хабар берди.
Маълум қилинишича, Нижнекамскдаги ҳужум оқибатида жами 13 киши, жумладан, бир нафар бола ҳалок бўлган. Қурбонлар орасида Ўзбекистон ва Тожикистон фуқаролари ҳам бор.
Минниханов ўз телеграммаларида ҳалок бўлганлар ва жароҳатланганларнинг яқинларига зарур ёрдам кўрсатилишини таъкидлаган.
Татаристон раҳбари қурбонларнинг оила аъзолари ва яқинларига чуқур ҳамдардлик билдириб, оғир дамларда уларга сабр-тоқат ва матонат тилаган. Шунингдек, жароҳатланганларнинг тезроқ соғайиб кетишини тилаган.
Аввалроқ 10 август куни эрталаб Татаристоннинг қатор саноат ва фуқаролик объектларига дронлар орқали ҳужум қилингани хабар қилинган эди. Расмий маълумотларга кўра, ҳодиса оқибатида 13 киши ҳалок бўлган, 70 дан ортиқ киши тиббий ёрдамга мурожаат қилган, 21 нафар фуқаро шифохонага ётқизилган.
Ҳодиса юзасидан Россия Тергов қўмитаси томонидан жиноят иши қўзғатилган. Татаристонда 10 август мотам куни деб эълон қилинган.
