Тошкентда «Иззат Назарбек» лақабли шахс қўлга олинди
У бир неча фуқародан қўрқитиш ва зўравонлик орқали йирик миқдорда пул талаб қилган. Тезкор тадбир давомида ундан икки дона тўппонча ва ўқ-дорилар ҳам аниқланган.
Тошкент шаҳрида тадбиркорлардан қўрқитиш ва зўравонлик йўли билан йирик миқдорда пул маблағларини талаб қилганликда гумонланган шахс қўлга олинди.
Маълум қилинишича, ҳуқуқни муҳофаза қилувчи органларга мурожаат қилган икки нафар фуқаро ўзини Иззат деб таништирган шахс ва унинг шериклари томонидан қўрқитиш ҳамда босим остида пул маблағлари талаб қилинганини билдирган.
Мурожаатчилардан бирининг айтишича, ундан BMW X5 автомашинаси учун 30 минг доллар, ошхона мебели учун эса 15 минг доллар тўлаш талаб қилинган. Умумий ҳисобда ундан 70 минг доллар олиб қўйилгани маълум қилинган.
Иккинчи мурожаатчи эса бизнесга мажбуран шерик қилинганини, унга нисбатан зўравонлик ишлатилгани ва қўрқитиш орқали автомашина сотиб олишга ҳамда жами 38 минг доллар беришга мажбур қилинганини билдирган.
Терговга қадар текширув давомида яна бир аёл ҳуқуқни муҳофаза қилувчи органларга мурожаат қилган. У ўзининг шахсий суратларини тарқатиш билан қўрқитилганини, учрашувга ва жинсий алоқага мажбурланганини маълум қилган.
Ўтказилган тезкор тадбирлар давомида гумонланувчининг шахси аниқланган. Тергов маълумотларига кўра, у 1988 йилда туғилган Исоқ исмли шахс бўлиб, «Иззат Назарбек» лақаби билан танилган. У Учтепа туманидаги спорт залида ўтказилган тезкор тадбир давомида қўлга олинган.
Тезкор тадбир доирасида гумонланувчида икки дона қурол ва ўқ-дорилар сақланаётгани аниқланган. Кўздан кечириш давомида «Байкал» русумли икки дона тўппонча, уларга тегишли ўқ-дорилар, пичоқлар ва тўппонча ғилофи процессуал тартибда расмийлаштириб олинган.
Ҳозирда ҳолат юзасидан Тошкент шаҳар Ички ишлар бош бошқармаси ҳузуридаги Тергов бошқармаси томонидан Жиноят кодексининг 165-моддаси 3-қисми «а» банди ҳамда 121-моддаси 4-қисми «в» банди билан жиноят иши қўзғатилган.
Гумонланувчига нисбатан қамоққа олиш тарзидаги эҳтиёт чораси қўлланган.
