Колумбиядаги зилзила оқибатида ҳалок бўлганлар сони 132 кишига етди
1 575 та турар жой биноси зарар кўрган, мамлакатда миллий фалокат ҳолати эълон қилинган.
Колумбияда содир бўлган 7,4 магнитудали кучли зилзила оқибатида 132 киши ҳалок бўлди, яна 570 киши жароҳат олди. Бу ҳақда Caracol телеканали расмий маълумотларга таяниб хабар берди.
Зилзила душанба куни эрталаб мамлакат ғарбидаги Чоко департаментининг Сан-Хосе-дел-Пальмар муниципалитети яқинида юз берган эди. Ер силкиниши Колумбиянинг катта қисми, шунингдек, қўшни давлатларда ҳам сезилган.
Табиий офат оқибатида 1 575 та турар жой биноси зарар кўрган, шундан 37 таси тўлиқ вайрон бўлган. Шунингдек, 18 та тиббиёт муассасаси, 52 та таълим муассасаси, 18 та йўл ва еттита аэропорт зарар кўрган.
Энг оғир вазият Перейра ва Кофе минтақаси, шунингдек, Валле-дел-Каука ва Чоко департаментларида кузатилмоқда. Мамлакатнинг қатор ҳудудларида қизил хавф даражаси эълон қилинган, айрим аэропортлар фаолияти вақтинча тўхтатилган.
Колумбия ҳукумати миллий фалокат ҳолатини эълон қилган. Айни пайтда ҳудудларда қидирув-қутқарув ва зарарларни бартараф этиш ишлари давом эттирилмоқда.
Маълумотларга кўра, мазкур зилзила Колумбияда сўнгги ўн йил ичида қайд этилган энг кучли сейсмик ҳодисалардан бири бўлган. Ер силкинишлари Венесуэла, Эквадор ва Панамада ҳам сезилган.
АҚШ табиий офат оқибатларини бартараф этиш ишларига кўмаклашиш учун қарийб 16 миллион доллар ажратган.
