Сурхондарёда фуқаролар икки ЙПХ ходимига тан жароҳати етказди
Дамасъни маст ҳолда бошқариб кетаётган ҳайдовчи ЙПХ ходимларидан қочишга уринган ва унинг яқинлари хизмат вазифасини бажараётган ИИО ходимларига қаршилик кўрсатиб, икки нафар ходимга тан жароҳати етказган.
Сурхондарё вилояти Ангор туманида хизмат вазифасини бажараётган ЙПХ ходимларига фаол қаршилик кўрсатилиб, икки нафар ходимга тан жароҳати етказилди. Бу ҳақда Сурхондарё вилояти ЙҲХБ матбуот хизмати маълум қилди.
Маълум қилинишича, 2026 йил 9 август куни Ангор туманида 1987 йилда туғилган фуқаро Т. У. «Damas» автомашинасини бошқариб кетаётган вақтида хизмат олиб бораётган ЙПХ ходимларини кўриб, ҳаракат йўналишини ўзгартирган ва қочишга уринган.
ЙПХ ходимлари автомашинани кузатиб бориб, «Илғор» маҳалласидаги хонадон яқинида ҳайдовчини тўхтатган. У автомобилдан тушиб, қочишга ҳаракат қилган. Ходимлар ҳайдовчидан спиртли ичимлик ҳиди келаётганини аниқлаб, уни тиббий кўрикдан ўтказиш учун олиб боришга уринган.
Шу вақтда воқеа жойига ҳайдовчининг укалари, турмуш ўртоғи ва қўшниси етиб келиб, хизмат вазифасини бажараётган ички ишлар органлари ходимларига фаол қаршилик кўрсатган. Натижада икки нафар ЙПХ ходимига тан жароҳати етказилган.
Ҳолат юзасидан Ангор тумани прокуратураси ва ИИБнинг тезкор-тергов гуруҳи воқеа жойига етиб бориб, ҳолатни ўрганган. Шу куннинг ўзида фуқароларга нисбатан Жиноят кодексининг 219-моддаси 2-қисми билан жиноят иши қўзғатилган.
Шунингдек, Сурхондарё вилояти ИИБ масъул ходимлари томонидан ЙПХ ходимларининг хатти-ҳаракатлари юзасидан ҳам хизмат текшируви ўтказилиши белгиланган. Текширув якунлари бўйича қўшимча маълумот берилиши маълум қилинди.
