Қарзи бўлмаган 3600 та хонадонга солиқ қарздорлиги ҳисобландими?
Тошкентда айрим хонадонлар учун ер солиғи қайта ҳисобланганига изоҳ берилди.
Ижтимоий тармоқларда Тошкентдаги айрим хонадонларга аввал мавжуд бўлмаган солиқ қарздорлиги ҳисоблангани ҳақида хабарлар тарқалди. Ҳолат Солиқ қўмитаси расмий муносабат билдирди.
Қайд этилишича, кўчмас мулк объектларига мол-мулк ва ер солиқлари кадастр идоралари маълумотлари асосида ҳисобланади. Тошкент шаҳар ҳокимининг 2023 йил 3 мартдаги қарори билан зона чегаралари қайта тасдиқланган. Шундан сўнг Юксалиш кўчаси ҳудуди 5-зонадан 4-зонага ўтказилиб, тегишли маълумотлар солиқ органларига тақдим этилган.
Шу асосда кўчмас мулк объектларининг ер солиғи 2023 йилдан 4-зона учун белгиланган ставкалар бўйича қайта ҳисоб-китоб қилинган.
Маълум қилинишича, Янгиҳаёт туманининг Хушнуд маҳалласидаги жами 144 та кўчмас мулк объектига солиқлар қайта ҳисобланган.
Шунингдек, 937-сонли Қонун ижросини таъминлаш доирасидаги хатлов натижаларига кўра, солиқ органларига ҳар ойда ўртача 50 мингга яқин объект бўйича маълумот келиб тушмоқда. Шу сабабли қайта ҳисоб-китоблар амалга оширилиши табиий жараён экани таъкидланган.
Расмий муносабатда қайта ҳисоб-китоблар амалдаги солиқ қонунчилиги талаблари асосида амалга оширилгани қайд этилган. Тўланадиган солиқлар маҳаллий бюджетларга йўналтирилиб, аҳолини ижтимоий ҳимоя қилиш, инфратузилмани ривожлантириш ва ҳудудларни ободонлаштиришга хизмат қилиши билдирилган.
