Сурхондарёда электр таъминоти тўлиқ тикланди
Блэкаутга Марказий Осиё ягона энергетика тизимида юзага келган аварияли ҳолат сабаб бўлганди.
14 август куни соат 14:38 да Марказий Осиё ягона энергетика тизимида авария юзага келиши оқибатида Ўзбекистон ва қўшни давлатларнинг айрим ҳудудларида электр таъминотида узилишлар кузатилди.
Энергетика вазирлигининг маълум қилишича, “Ўзбекистон миллий электр тармоқлари” компанияси маълумотига кўра, электр тармоқлари ва подстанцияларидаги аварияга қарши автоматика тизимлари ўз вақтида ва тўғри ишлаши натижасида авариянинг Ўзбекистон энерготизимида кенгайиб кетишининг олди олинган.
Шунингдек, қисқа вақт ичида йўқолган қувватни қоплашда энергия сақлаш тизимларидаги (BESS) захира энергиянинг тармоққа тезкор узатилиши муҳим роль ўйнаган. Бу тизимлар зарур пайтда энергияни жуда қисқа вақт ичида тармоққа етказиб, қувват мувозанатини тиклаш ва электр частотасининг кескин пасайишининг олдини олишга хизмат қилган.
Қайд этилишича, Сурхондарё вилоятининг электр таъминоти асосан иккита 500 кВ кучланишли электр узатиш тармоғи орқали таъминланади. Улардан бири қўшни давлат ҳудудидан, иккинчиси Қашқадарё вилояти ҳудудидан электр энергиясини етказиб беради.
Авария вақтида ушбу тармоқлардан бирида режали таъмирлаш ишлари олиб борилаётган бўлган. Шу сабабли қўшни давлатдан электр энергияси келадиган тармоқдаги узилиш вилоят таъминотини қисқа муддатда тўлиқ тиклаш имкониятини чеклаган.
Хабарга кўра, тезкор чоралар натижасида режали таъмирлашдаги 500 кВли электр узатиш тармоғи хавфсизлик талабларига мувофиқ ишга тайёр ҳолатга келтирилиб, қайта ишга туширилган. Шундан сўнг Сурхондарёда электр таъминоти босқичма-босқич тўлиқ тикланган.
