“Ҳудудгаз Қорақалпоғистон”да 251,5 млрд сўмлик зарар аниқланди
Ҳолат юзасидан мансабдорларга нисбатан жиноят иши қўзғатилган.
“Ҳудудгаз Қорақалпоғистон” газ таъминоти филиалида табиий газ ҳисобини юритиш билан боғлиқ ҳолатда давлат ва жамият манфаатларига 251,5 миллиард сўмлик зарар етказилгани аниқланди.
Бош прокуратура ҳузуридаги Департаментнинг Қорақалпоғистон Республикаси бошқармаси ўтказган терговга қадар текширувда филиал масъул ходимлари томонидан қабул қилиб олинган ва истеъмолчиларга етказиб берилган табиий газ ҳажми ўртасидаги тафовутнинг сабаблари аниқланмагани маълум бўлган.
Ушбу фарқ ҳисоботларда оддий газ йўқотиши сифатида кўрсатилган. Натижада давлат ва жамият манфаатларига 251,5 миллиард сўмлик зарар етказилган.
Ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 205-моддаси (ҳокимият ёки мансаб ваколатини суиистеъмол қилиш) билан жиноят иши қўзғатилган.
Ҳозирда тергов ҳаракатлари олиб борилмоқда.
