Саида Мирзиёева Қатарда “Ўзбекистон: ҳаракатдаги мерос” кўргазмасининг очилишида иштирок этди
Шунингдек, Доҳа шаҳрида қатарлик етти нафар ҳунарманднинг Ўзбекистонга ижодий сафари якунларига бағишланган “Экташиф Ўзбекистон” кўргазмаси ҳам очилди.
Президент Администрацияси раҳбари Саида Мирзиёева Шайха Ал-Маясса бинт Ҳамад бин Халифа Ол Соний билан биргаликда Қатар Ислом санъати музейида ташкил этилган “Ўзбекистон: ҳаракатдаги мерос” кўргазмасининг очилиш маросимида иштирок этди.
Кўргазмадан Ўзбекистон музейлари ҳамда Қатар коллекцияларидан ўрин олган ноёб экспонатлар жой олган. Экспозиция ислом дини тарқалишидан аввалги даврлардан бошлаб Сомонийлар ва Темурийлар даврлари ҳамда бугунги кунгача бўлган тарихий босқичларни қамраб олади.
Унда Ўзбекистоннинг бой тарихий ва маданий меросини акс эттирувчи нодир осори-атиқалар, анъанавий ҳунармандчилик ва тўқимачилик санъати намуналари намойиш этилмоқда.
Саида Мирзиёева ушбу кўргазма Қатар халқи ва мамлакат меҳмонларини Ўзбекистоннинг бой тарихи ва маданий мероси билан яқиндан таништириш учун муҳим имконият эканини таъкидлади. Шунингдек, мазкур лойиҳа Ўзбекистон-Қатар маданий алоқаларини янада ривожлантиришга хизмат қилиши қайд этилди.
Шу куни қатарлик етти нафар ҳунарманднинг Тошкент, Самарқанд ва Бухоро шаҳарларига уюштирилган ижодий сафари якунларига бағишланган “Экташиф Ўзбекистон” кўргазмаси ҳам ўз ишини бошлади.
Унда Ўзбекистоннинг бой маданияти ва анъаналаридан илҳомланган қатарлик ҳунармандлар томонидан яратилган заргарлик буюмлари, хаттотлик санъати намуналари, нафис гиламлар ҳамда ижодий сафар таассуротларини акс эттирувчи фотосуратлар намойиш этилмоқда.
