Сербияда Шавкат Мирзиёевни расмий кутиб олиш маросими бўлиб ўтди
Маросимдан сўнг икки давлат раҳбарлари олий даражадаги музокараларни бошлади.
Белград шаҳридаги Сербия саройида Сербия Республикасига расмий ташриф билан борган Президент Шавкат Мирзиёевни тантанали кутиб олиш маросими бўлиб ўтди.
Сербия Президенти Александр Вучич Ўзбекистон давлат раҳбарини самимий кутиб олди.
Олий мартабали меҳмон шарафига фахрий қоровул саф тортди. Ҳарбий оркестр ижросида Ўзбекистон ва Сербия давлат мадҳиялари янгради. Шунингдек, артиллерия тўпларидан 10 марта ўқ узилиб, тантанали салют берилди.
Давлат раҳбарлари фахрий қоровул сафи олдидан ўтиб, расмий делегациялар аъзолари билан саломлашдилар ва биргаликда суратга тушдилар.
Шундан сўнг Ўзбекистон ва Сербия президентлари раислигида олий даражадаги музокаралар бошланди.
