Чорвоқдаги фожиа: чўккан уч кишидан иккинчисининг жасади ҳам топилди
Ҳозирда отанинг жасадини қидириш ишлари давом эттирилмоқда.
Чорвоқ сув омборида 2 сентябрь куни чўкиб кетган уч нафар фуқаронинг иккинчисининг жасади ҳам топилди.
Маълум қилинишича, 10 сентябрь куни соат 12:07 да Фавқулодда вазиятлар вазирлиги ғаввослари томонидан қидирув ишлари давомида иккинчи фуқаронинг жасади аниқланиб, сувдан олиб чиқилган.
Воқеа Тошкент вилояти Бўстонлиқ туманидаги «Бурчмулла» МФЙ ҳудудида жойлашган Чорвоқ сув омборида содир бўлган. Ота ва унинг икки ўғли сувга тушиш тақиқланган ҳудудда ҳимоя нимчаларисиз чўмилган.
Дастлаб ўғиллардан бири сувга тушиб, чўка бошлаган. Унга ёрдам бериш мақсадида акаси ва отаси ҳам сувга тушган. Бироқ оқибатда учаласи ҳам сувда чўкиб кетган.
Қидирув ишлари натижасида 9 сентябрь куни соат 13:02 да фуқаролардан бирининг жасади топилган эди. Бугун эса иккинчи ўғилнинг жасади ҳам топилди.
Ҳозирда отанинг жасадини қидириш ишлари давом эттирилмоқда.
