Миллий музей Марказий Осиёдаги энг йирик маданий лойиҳалардан бирига айланиши шубҳасиз — Саида Мирзиёева
Музейнинг меъморий концепцияси нуфузли Прицкер мукофоти соҳиби Тадао Андо томонидан ишлаб чиқилган.
Бугун Президент Шавкат Мирзиёев Тошкент шаҳрида барпо этилаётган янги Ўзбекистон Миллий музейи қурилиш жараёни билан танишди.
Музейнинг меъморий концепцияси жаҳоннинг энг машҳур архитекторларидан бири, нуфузли Прицкер мукофоти соҳиби Тадао Андо томонидан ишлаб чиқилган.
Саида Мирзиёеванинг ёзишича, Тадао Андонинг лойиҳаси бўйича бунёд этилган музей ва маданий масканлар Япония, Европа ҳамда АҚШда юксак қадрланади. Унинг меъморий услуби чизгиларининг соддалиги ва аниқлиги, макон ва ёруғлик уйғунлигига ўзига хос ёндашуви билан дунёга танилган.
“Миллий музей Марказий Осиёдаги энг йирик маданий лойиҳалардан бирига айланиши шубҳасиз. Бу даргоҳда кўргазма заллари, кутубхона, реставрация лабораториялари ва таълим майдонлари ўрин олади”, дея ёзди Саида Мирзиёева.
Президент администрацияси раҳбарининг қайд этишича, мамлакатдаги ана шундай тарихий аҳамиятга молик лойиҳалар устида дунё миқёсидаги меъморлар ишлаши жуда муҳим бўлиб, улар барпо этган объектлар узоқ йиллар давомида халққа хизмат қилади, тарих ва маданий мероснинг ажралмас қисмига айланади.
