BMW’даги фожиа: ЙПХ инспекторини уриб кетиб, унинг ўлимига сабабчи бўлган ўқувчи қамалди
Инспекторнинг ўлимига сабаб бўлган вояга етмаган ўсмирга суд ҳукми ўқилди.
Жиноят ишлари бўйича Миробод туман судида ЖКнинг 104-моддаси 3-қисми «д» банди — жабрланувчининг вафотига сабаб бўлган даражада қасддан баданга оғир шикаст етказиш билан боғлиқ жиноят иши бўйича суд мажлиси якунланди. Бу ҳақда Тошкент шаҳар судлари хабар берди.
Иш ёпиқ суд мажлисида кўриб чиқилган. Судланувчи 2010 йилда туғилган, хусусий мактабнинг 10-синфида таҳсил олувчи вояга етмаган шахс бўлган.
Суд ҳукмига кўра, судланувчи ЖКнинг мазкур моддасида назарда тутилган жиноятни содир этишда айбдор деб топилган. Унга Жиноят кодексининг 85-моддаси тартибида 2 йил 4 ой муддатга озодликдан маҳрум қилиш жазоси тайинланган.
Жазо муддатини ҳисоблаш судланувчига нисбатан “қамоққа олиш” эҳтиёт чораси қўлланган 2026 йил 27 февралдан бошланган.
Суд якунида раислик қилувчи тарафларга ҳукм мазмунини, жиноят оқибатида етказилган моддий ва маънавий зарарларни ундириш масаласида фуқаролик тартибида судга мурожаат қилиш ҳуқуқини, шунингдек, суд ҳукми устидан шикоят қилиш муддати ва тартибини тушунтирган.
Эслатиб ўтамиз, 25 февраль куни соат 21:30 ларда 2010 йилда туғилган Д. Т. танишининг опасига тегишли БМВъни автомойкадан ходимларни огоҳлантирмасдан олиб чиқиб кетган.
У Миробод тумани Нукус кўчасида ЙПХ инспектори, кичик сержант Ҳосилбек Эшназаровнинг тўхташ ҳақидаги қонуний талабига бўйсунмай, уни автомобиль билан уриб юборган ва воқеа жойидан кетган.
Оғир тан жароҳати олган инспектор 27 февраль куни шифокорлар саъй-ҳаракатига қарамай вафот этган.
