Шавкат Мирзиёев Владимир Путинни таваллуд куни билан табриклади
Ўзбекистон ва Россия етакчилари телефон орқали мулоқот қилиб, савдо-иқтисодий, маданий-гуманитар ва бошқа йўналишлардаги ҳамкорликни муҳокама қилди.
Шавкат Мирзиёев 7 октябрь куни Россия Федерацияси Президенти Владимир Путин билан телефон орқали мулоқот қилди.
Давлат раҳбари Россия етакчисини таваллуд куни билан самимий табриклаб, унга мустаҳкам соғлиқ, бахт-саодат ва муваффақиятлар, Россия халқига эса тинчлик ва равнақ тилади.
Мулоқот давомида Владимир Путиннинг замонавий Россияни барпо этишдаги тарихий роли ҳамда Ўзбекистон ва Россия ўртасидаги кенг қамровли стратегик шериклик ва иттифоқчилик муносабатларини ривожлантиришга қўшаётган шахсий ҳиссаси қайд этилди.
Томонлар икки давлат ўртасидаги ҳамкорлик барча йўналишларда жадал ривожланиб бораётганини мамнуният билан таъкидлади. Хусусан, ўзаро савдо ҳажми, саноат, энергетика ва бошқа устувор соҳаларда етакчи корхоналар ўртасидаги кооперация кўлами изчил ортиб бораётгани қайд этилди.
Шунингдек, 6 октябрь куни Фарғона шаҳрида бўлиб ўтган Ҳукуматлараро комиссиянинг навбатдаги йиғилиши ҳамда Ҳудудлар кенгашининг учинчи йиғилиши якунлари юқори баҳоланди.
Маданий-гуманитар алоқалар доирасидаги фаол алмашинувлар давом этаётгани ҳам қайд этилди. Яқинда Ўзбекистонда “Санъатлар олами” Россия санъати фестивали ўтказилган бўлса, айни кунларда Москвада Ўзбекистон маданияти кунлари бўлиб ўтмоқда.
Суҳбат давомида халқаро ва минтақавий аҳамиятга молик долзарб масалалар юзасидан ҳам фикр алмашилди. Шунингдек, бўлажак тадбирлар режаси муҳокама қилинди.
