Тинчлик келишувини ҳозир тузишга тайёрман — Зеленский

Украина президенти Володимир Зеленский Россияга қўшимча ҳудудларни беришни рад этган ҳолда, амалдаги фронт чизиғи бўйлаб ўт очишни тўхтатиш орқали урушни якунлашга тайёрлигини маълум қилди. Бу ҳақда у ABC News телеканалига берган интервьюсида айтди.

 

Зеленскийнинг таъкидлашича, агар имконияти бўлганида, у тинчлик келишувини бугуноқ тузишга рози бўларди. Унинг сўзларига кўра, Украина урушни имкон қадар тезроқ тўхтатиш ва жанговар ҳаракатларни ҳозирги алоқа чизиғи бўйлаб музлатишга тайёр.

 

Украина президенти Россия мамлакат ҳудудининг 19,3 фоизини назорат қилаётганини айтди. Бироқ Киев вақтинча босиб олинган ҳудудларни Россия таркибидаги ерлар сифатида тан олишга рози эмас. Зеленский Донбасдан чекиниш Украинадан ҳудудий ён беришни талаб қилишини таъкидлади.

 

Интервьюда АҚШнинг Украинага кўрсатаётган ёрдами ҳам муҳокама қилинди. Зеленский ўзини АҚШ томонидан хиёнатга учрагандек ҳис қилмаслигини, бироқ амалдаги ёрдамни етарли қўллаб-қувватлаш деб билмаслигини билдирди.

 

"Мен нимани ҳис қилаётган бўлсам, шуни айтяпман. Бу қўллаб-қувватлаш эмас", — деди Украина президенти.

 

Шунингдек, Зеленский сўнгги уч ой ичида АҚШдан атиги 24 та Patriot ҳаво ҳужумидан мудофаа тизими учун тутиб қолувчи ракета олганини айтди. Унинг таъкидлашича, Украина ҳаво ҳужумларидан ҳимояланиш учун бундан анча кўпроқ ракетага муҳтож.