Ким Чен Ин Хитойга борди: икки давлат ўртасида янги кўприк очилди

Шимолий Корея етакчиси Ким Чен Ин Хитойга ташриф буюриб, икки мамлакатни боғловчи янги кўприкнинг очилиш маросимида қатнашди. У Пекин билан тарихий дўстликни давом эттириш ва амалий ҳамкорликни кенгайтириш ниятида эканини билдирди. Бу ҳақда AP хабар берди.

 

Синьхуа ахборот агентлиги хабарига кўра, Ким Хитой Коммунистик партияси Сиёсий бюроси доимий қўмитаси аъзоси Ван Хунин билан учрашган. Томонлар автомобиль заводини кўздан кечириб, икки томонлама муносабатларни мустаҳкамлашга келишиб олган.

 

Ялу дарёси устидаги янги кўприк Хитой ва Шимолий Корея ўртасидаги савдо алоқаларини кенгайтиришга хизмат қилиши кутилмоқда. У орқали контейнерлар ва оғир юк машиналарининг тун-у кун ҳаракатланиши режалаштирилган.

 

Қайд этилишича, Кимнинг Хитойга ташрифи Пхеньян сўнгги йилларда Россия билан алоқаларни кучайтирганидан кейин Пекин билан муносабатларни ҳам фаоллаштиришга интилаётган бир пайтда юз берди. Шимолий Корея Россиянинг Украинадаги урушини қўллаб-қувватлаш учун минглаб аскар ва қурол-яроғ юборган. Бунинг эвазига Пхеньян ҳарбий ва иқтисодий ёрдам олган бўлиши мумкин.

 

Ташриф 25 октябрь куни нишонланадиган Корея урушида Хитойнинг иштироки билан боғлиқ муҳим сана арафасига тўғри келди. Ким урушда ҳалок бўлганларни хотирлаш ҳам ташриф мақсадларидан бири эканини айтган.

 

Шу билан бирга, Шимолий Корея АҚШ ва Жанубий Корея билан муносабатларда қатъий позициясини сақлаб қолмоқда. Пхеньян Вашингтондан «душманона сиёсати»ни ўзгартиришни ва музокараларни қайта бошлаш учун ядровий қуролсизланишни дастлабки шарт сифатида қўйишни тўхтатишни талаб қилмоқда.

 

Жанубий Корея разведка хизмати ўтган ой АҚШ президенти Дональд Трамп ва Ким Чен Ин ноябрда Хитойнинг Шенчжен шаҳрида ўтадиган APEC саммити доирасида учрашиши эҳтимолини 50 фоиз деб баҳолаган эди.