“Дўстлик”дан икки баробар катта: Қирғизистон билан янги чегара пости очилади

Ўзбекистон ва Қирғизистон ўртасида «Дўстлик» чегара постига нисбатан икки баробар катта бўлган янги «Кесканёр» чегара постини очиш бўйича келишувга эришилди. Бу ҳақда Президент Шавкат Мирзиёев раислигида Андижон вилоятини ривожлантириш масалаларига бағишланган йиғилишда маълум қилинди.

Янги чегара постининг лойиҳаси уч ой ичида ишлаб чиқилади. Шундан сўнг қурилиш ишларини бошлаш вазифаси қўйилди.

«Кесканёр» постининг ишга туширилиши Қирғизистон билан чегарадаги юк ташиш ҳажмини 2–3 карра ошириш ҳамда юкларнинг етказиб берилиш муддатини бир ҳафтага қисқартириш имконини беради.

Янги транспорт оқимини ҳисобга олиб, 78 километр узунликдаги “Хонобод – Андижон” пулли автомобиль йўлини лойиҳалашга ҳам киришилади.

Шунингдек, шу ойдан “Тошкент – Андижон” йўналишида тезюрар поезд қатнови йўлга қўйилди. Натижада ушбу йўналишда сафар вақти 6 соатдан 4 соатгача қисқарди.

Келгуси йилда эса “Тошкент – Андижон” пулли автомобиль йўлини қуриш бўйича амалий ишларни бошлаш режалаштирилган.